Bejn il-17 u l-19 ta’ Mejju, fit-Tony Bezzina Stadium, l-akkademja tal-futbol ta’ Hibernians FC se tkun qed tospita tournament internazzjonali ta’ taħt it-12-il sena fit-Tony Bezzina Stadium. B’kollox se jieħdu sehem 12 il-tim, fosthom l-akkademji elite ta’ Barcelona, Juventus u Lazio.
Din se tkun l-ewwel edizzjoni tat-Tournament li jfakkar il-memorja ta’ Tony Bezzina b’madwar 180 tifel u tifla jingħaqdu biex jieħdu sehem f’ ċelebrazzjoni ta’ futbol għaż-żgħażagħ. L-avveniment huwa wkoll ġieħ xieraq lil Tony Bezzina, il-President ikoniku ta’ Hibernians FC li miet tliet snin ilu wara li mexxa lill-klabb tal-Premier Malti għal aktar minn erba’ deċennji.
Ranier Bezzina, il-President ta’ Hibernians FC, qal: “It-Tony Bezzina Memorial Tournament huwa ġieħ xieraq għall-memorja ta’ missieri, ħolqa bejn il-passat glorjuż tal-klabb tagħna, il-preżent u l-futur rappreżentat mill-plejers żgħażagħ li qed jipparteċipaw f’dan it-tournament internazzjonali”.
Apparti Hibernians, se jkunu qed jieħdu sehem ukoll Melita, Piera Hotspurs u St. Andrews filwaqt lit-timijiet internazzjonali li se jieħdu sehem huma Partizan Belgrade, Barcelona, Hammarby, Messina, Virtus Francavilla, Juventus, Lazio u Minaj FC.
Il-parteċipanti ġew maqsuma fi tliet gruppi bl-ewwel partiti jibdew il-Ġimgħa 17 ta’ Mejju fis-16.20 u se jlaqqaw lill-Hibernians FC u Juventus FC. Il-partiti finali huma skedati għall-Ħadd segwiti immedjatament miċ-ċerimonja tal-għeluq wara nofsinhar. Se jintlagħbu żewġ logħbiet fl-istess ħin matul it-tournament ta’ tlett ijiem fil-Tony Bezzina Stadium.
Andrei Agius, id-Direttur tal-Hibernians Football Academy li jmexxi wkoll it-tim organizzattiv, jemmen li tournaments internazzjonali għandhom ħafna benefiċċji għall-plejers żgħażagħ.
“L-esperjenza internazzjonali hija kruċjali għal raġunijiet differenti,” spjega Agius. “Tournaments bħal dawn jgħinu lit-tfal jevolvu bħala bnedmin, isiru aktar maturi u indipendenti, u gradwalment jitgħallmu ma jiddependux wisq fuq il-ġenituri tagħhom.
“Mill-perspettiva teknika, il-livell tal-logħba barra mill-pajjiż żgur li jimbotta lit-tfal biex jgħollu l-livell, u huwa biss billi nesponu t-talenti żgħażagħ tagħna għal realtajiet bħal dawn li nistgħu nagħtuhom futur aħjar.”
L-ewwel edizzjoni tat-Tony Bezzina Memorial Tournament hija appoġġjata minn VisitMalta, il-Kunsill Lokali ta’ Raħal Ġdid u SportMalta. Msieħba oħra jinkludu Bezzina Group, Player and Events, u ACM.
