F’semi-finali mill-isbaħ u mimlija emozzjonijiet mill-bidu sat-tmiem, u bla dubju waħda mill-isbaħ partiti ta’ matul dan l-istaġun, Floriana għelbu lil Gzira United wara l-għoti tal-penalties u b’disa’ players. Dan wara li sa tmiem il-ħin regolamentari, il-partita ntemmet fi draw ta’ 2-2 b’Floriana jiskorjaw ħames penalties filwaqt li Gzira skorjaw erba.
Kienu Floriana li ħolqu l-ewwel periklu fit-tmien minuta meta Willis Furtado kellu xutt b’saħħtu jiġi mblukkat mill-goalkeeper tal-Maroons Darijan Zarkov, biex mir-rebound Matheus De Sousa tefa’ ġewwa, iżda r-referee Matthew De Gabriele kien pront u ħassar dan il-goal minħabba offside.
Iżda kienu Gzira li fetħu l-iskor fl-10 minuta meta wara li rċieva minn azzjoni ta’ corner mogħti minn Jackson Mendoza, Gabriel Bohrer Mentz, permezz ta’ daqqa ta’ ras preċiza minn ġol-kaxxa tefa’ ġewwa.
Huma komplew jippersistu u żewġ minuti biss wara, freekick insidjuż ta’ Gabriel Bohrer Mentz għadda għoli.
Floriana wettqu reazzjoni tajba u fis-17-il minuta Alexandros Kouro venven xutt mid-distanza li iżda stampa mal-wieqfa, bi Gzira jeħilsuha ħafif.
Gzira reġgħu ħolqu l-periklu fil-35 minuta meta Lucas Macula kellu konklużjoni fil-baxx li ntemmet ftit barra.
Huma komplew jiddettaw il-logħob u minuta biss wara, għal darb’oħra minn azzjoni ta’ corner, il-goalkeeper tal-Greens Andrijanic ippanċja l-ballun ‘il barra li ntemm għand Zachary Cassar li permezz ta’ xutt minn tarf il-kaxxa għadda l-ballun minn fuq il-goalkeeper ta’ Floriana Nemanja Andrijanic li nqabad ftit barra minn postu, biex b’hekk irnexxielu jsib ix-xibka proprju kontra l-ex team tiegħu.
Floriana tefgħu kollox fuq l-attakk u fl-40 minuta Matias Nicolas Garcia kellu x-xutt tiegħu mid-distanza jiġi mxellef f’corner minn Darijan Zarkov.
Ħames minuti wara reġa’ kien l-istess Garcia li ttanta xortih permezz ta’ xutt mid-distanża li din id-darba ntemm għoli.
L-isforzi tal-Greens ġew finalment ippremjati sekondi biss wara meta minn azzjoni ta’ corner mogħti minn Kemar Reid, Matias Nicolas Garcia, permezz ta’ daqqa ta’ ras b’lura rnexxielu jsib ix-xibka, b’dan kien l-ewwel goal li sofrew Gzira f’din il-kompetizzjoni matul dan l-istaġun.
Fil-ftuħ tat-tieni taqsima Floriana ħarġu ferm aggressivi u fis-47 minuta Kemar Reid kellu d-daqqa ta’ ras tiegħu salvata minn fuq il-linja bil-captain tal-Maroons Zachary Scerri, isalva l-ballun minn fuq il-linja fatali bir-ras, fost protesti ferventi mill-players tal-Greens hekk kif skont huma l-ballun kien qabeż il-linja.
Iżda mill-corner li rriżulta huma ġabu l-iskor indaqs meta minn cross ta’ Luis Willis Furtado, Kemar Reid, bir-ras tefa’ l-ballun wara Zarkov.
Fit-58 minuta, Floriana qalgħu daqqa ta’ ħarta meta tkeċċa għalihom Matias Nicolas Garcia li kien qed ikollu partita mill-aqwa wara li rċieva ammonizzjoni doppja fi spazju ta’ żewġ minuti.
L-affarijiet komplew ġejjin ħażin għall-Greens meta fit-72minuta tkeċċa għalihom Oualid El Hasni wara li daħal b’żewġ saqajn fuq Jackson Mendoza, biex b’hekk huma spiċċaw jilagħbu b’disa’ players.
Fis-77 minuta Kyle Spence impenja lill-goalkeeper ta’ Florian Andrijanic li salva tajjeb minn mal-art.
Huma komplew fuq l-offensiva u tliet minuti wara Lucas Macula kellu l-konklużjoni tiegħu mill-viċin tgħaddi tħakkek ma’ sieq il-wieqfa.
Floriana wieġbu fit-83 minuta meta f’azzjoni veloċi Kemar Reid ġie wiċċ imb’wiċċ ma’ Zarkov li xellef il-ballun f’corner.
Gzira reġgħu ħolqu l-periklu ħames minuti wara meta Lucas Macula kellu xutt fil-baxx mid-distanza salvat minn Andrijanic minn mal-art.
L-iskor sa tmiem id-90 minuta baqa’ ma nbidilx bil-partita jkollha tmur għall-ħin barrani.
Fid-99 minuta Floriana tilfu ċans tad-deheb li jaqilbu l-iskor favurihom meta is-sostitut Mattia Veselji kellu xutt mill-viċin salvat tajjeb minn Zarkov.
Huma komplew jiddettaw il-logħob u fil-111-il minuta Jake Grech kellu l-freekick spettakolari tiegħu jistampa mal-mimduda, b’din tkun it-tieni lasta li laqtu l-Greens f’din il-partita.
L-iskor baqa’ intatt anke wara l-ħin barrani u b’hekk il-partita kellha tmur għall-għoti tal-penalties.
Mill-11-il metru għal Floriana skorjaw Mattia Veselji, Jake Grech, Kemar Reid, Carlo Zammit Lonardelli u l-goalkeeper Nemanja Andrijanic.
Dan sabiex għal Gzira irnexxielhom isibu x-xibka Gabriel Bohrer Mentz, Jackson Mendoza, Ewertton Silva, Thiago Espindola waqt li falla Thaylor Aldama li tefa’ għoli.
