Il-Prim Ministru Robert Abela esprima t-tħassib serju tiegħu dwar xniegħat li l-inkjesta maġisterjali dwar il-konċessjoni tat-tliet sptarijiet intemmet proprju mal-bidu tal-kampanja elettorali għall-elezzjonijiet tat-8 ta’ Ġunju li ġej meta din suppost ingħalqet erba’ snin ilu.
Il-Prim Ministru esprima dan it-tħassib it-Tnejn filgħaxija, f’kummenti mal-midja barra l-istazzjon ONE, wara li ħa sehem fil-programm ġdid ‘8/06’. Hu kien mistoqsi dwar dikjarazzjonijiet li għamel waqt l-għeluq tal-Konferenza Ġenerali tal-Partit Laburista, meta sostna li l-ġustizzja ma tfissirx terroriżmu politiku. Dwar dan kien hemm attakk ikkordinat mill-Partit Nazzjonalista u l-establishment.
Jiġifieri l-inkjesta Maġisterjali, li suppost ingħalqet wara 60 ġurnata, issa nifhem li jista’ jkun hemm fatti speċifiċi partikolari li kienu jeħtieġu li l-maġistrat tieħu aktar żmien mis-60 ġurnata li ssemmi l-liġi. Imma li ddum erba’ snin u nofs u tingħalaq proprju mal-ftuħ tal-kandidatura tal-Parlament Ewropew, f’kuntest ukoll li jien dan ix-xenarju kont tkellimt dwaru erba’, tlieta, xhur ilu, ma jqajjimlekx suspett lilek, ma jqajjimx suspett lill-poplu b’mod ġenerali. Ngħid għalija, jekk veru hu dak li qed nisimgħu, ninsab inkwetat. U nkwetat, mhux għax b’xi mod il-kwistjoni tat-timeline politiku fih innifsu, l-inkwiet tiegħi żġur hu li organu ġudizzjarju jintuża għal dan l-iskop, meta l-ġustizzja għandha tinfatam għal kollox minn kwistjonijiet partiġġjani politiċi, il-ġustizzja b’mod għami titwettaq il-ġustizzja.
Il-Prim Ministru Robert Abela
Mal-midja, Dr Abela għamel referenza għal dak li ddikjara ftit tax-xhur ilu dwar l-inkjesta maġisterjali li tmexxiet mill-Maġistrat Gabriella Vella.
Sostna li dakinhar kellu indikazzjonijiet ċari li proċess ta’ investigazzjoni partikolari seta’ jintuża biex ifixkel it-timeline politiku marbut mal-elezzjonijiet li ġejjin.
Il-Prim Ministru sostna li d-dikjarazzjoni li għamel nhar il-Ħadd saret b’referenza għall-integrità u ż-żmien tal-proċess ġudizzjarju u mhux dwar il-mertu jew individwu jew individwi li jistgħu jissemmew f’din l-inkjesta.
Mhux it-timings tad-diskors, it-timings tal-inkjesta għidli lili, it-timing tal-għeluq tal-proċess verbali, mhux it-timing tad-diskors, mela meta huwa mistenni li nitkellem jiena? Sena wara li jiġi ppubblikat il-proċess verbal, jew jekk verament hu minnu li l-proċess verbal ġie trasmess mingħand l-uffiċċju tal-Maġistrat inkwerenti għall-uffiċċju tal-Avukat Ġenerali fi ftuħ il-kandidatura, jista’ jkun li l-kap tal-eżekuttiv jibqa’ sieket? Però noqogħdu attenti ferm, kulħadd għandu dritt li jitkellem u jipproteġi l-integrità tal-proċess ġudizzjarju. Fl-aħħar mill-aħħar, ir-retta amministrazzjoni tal-ġustizzja mhix tal-maġistrati u tal-imħallfin, hi tal-poplu, għax il-poplu tagħna għandu jkollu s-serħan il-moħħ li l-proċess ġudizzjarju jaħdem b’mod newtrali u b’mod indipendenti.
Il-Prim Ministru Robert Abela
Il-Prim Ministru tenna li kulħadd jista’ jasal għall-konklużjonijiet tiegħu u daqstant ieħor id-deċizjonijiet li se nieħdu fit-8 ta’ Ġunju.
Jiena konvint li l-poplu Malti u Għawdxi hu poplu intelliġenti, poplu li jaf jasal għall-konklużjonijiet tiegħu, u poplu li jekk se jara li l-ġurnata magħżula kienet proprju l-ftuħ tal-kandidatura tal-elezzjonijiet tal-kunsilli lokali u tal-Parlament Ewropew, il-one plus one tiegħu kulħadd se jagħmlu u daqstant ieħor, imbagħad, huma d-deċiżjonijiet li se nieħdu fit-8 ta’ Ġunju, jiġifieri jekk hux poplu li lest jaċċetta, irrispettivament mill-mertu u mill-persuni, lanqas ħa mmiss il-mertu u l-persuni, imma jekk għandek dan it-tip ta’ deċiżjonijiet, imbagħad, il-poplu jrid jibgħat il-mandat tiegħu u l-verdett tiegħu, għax imbagħad, fl-aħħar mill-aħħar, ħadd mhu aktar b’saħħtu mis-sovranità tal-poplu.
Il-Prim Ministru Robert Abela
