Santa Lucia kkonvinċew bis-sħiħ meta għelbu lil Gzira United bl-iskor ta’ 2-1, biż-żewġ goals għalihom jaslu proprju fl-ewwel taqsima. B’hekk baqgħu jittamaw li staġun ieħor jilagħbu fil-Kampjonat Premier, fejn iżda huwa imperattiv għalihom li jegħlbu lil Birkirkara fl-aħħar partita tal-istaġun.
Dan jgħodd ukoll għal Gzira li biex jassiguraw posthom mal-elite tal-futbol Malti, iridu jegħlbu lil Floriana fl-aħħar ġurnata.
Il-Luċjani għamlu l-intenzjonijiet tagħhom ċari mal-ftuħ tal-partita u fetħu l-iskor wara biss żewġ minuti permezz ta’ xutt minn distanza ta’ madwar 40 metru ta’ Carlos Gabriel Moreira De Oliveira li ħasad għal kollox lill-goalkeeper Kroat tal-Maroons, Darijan Zarkov.
Gzira wieġbu fl-14-il minuta permezz ta’ xutt mid-distanza ta’ Gabriel Bohrer Mentz li ġie salvat parzjalment mill-goalkeeper tal-Luċjani Francisco Celio da Paz Silva, biex mir-rebound Jackson Mendoza bir-ras tefa’ barra.
Huma komplew jippressaw u tliet minuti wara Thaylor Aldama kellu xutt insidjuż li ġie mdawwar f’corner bi bravura minn Da Paz.
Santa Lucia reġgħu ħolqu l-periklu fil-31 minuta meta Aleksa Mrdja avvanza tajjeb fil-kaxxa iżda kellu x-xutt tiegħu mill-viċin jaħbat max-xibka minn barra biex b’hekk ta l-illużjoni tal-goal.
Huma kompew jiddettaw il-logħob u sekondi biss wara rebħu penalty meta Farid Romero Zuniga waqqa’ lil Mrdja fil-kaxxa. Mill-11-il metru inkariga ruħu Carlos Gabriel Moreira De Oliveira li ma żbaljax hekk kif permezz ta’ xutt b’saħħtu fil-baxx tefa’ l-ballun wara Zarkov, biex b’hekk irreġistra doppjetta personali.
It-tieni taqsima kienet ferm nieqsa mill-emozzjoni, bl-ewwel azzjoni denja ta’ nota tkun proprju dik li waslet għall-goal ta’ Gzira fil-85 minuta, li permezz tiegħu naqsu l-marġni tal-iskor, meta Dacosta Boadu mir-rebound u b’logħob tat-tfal minn taħt il-lasta tefa’ ġewwa.
Gzira tefgħu kollox fuq l-attakk fit-tentattiv li jġibu l-iskor indaqs, iżda l-Luċjani baqgħu jamministraw il-vantaġġ minimu li kellhom sa tmiem il-partita.
Referee: Ishmael Barbara
BOV Plejer tal-Logħba: Carlos Gabriel Moreira De Oliveira (Santa Lucia)
