Ebda goal bejn Sliema Wanderers u Naxxar Lions f’logħba li fiha ddominaw id-difiżi bil-Lions jiksbu punt ferm prezzjuz li prattikament aċċertalhom posthom fil-Kampjonat Premier.
L-ewwel taqsima kienet ferm medjokri u nieqsa mill-azzjonijiet. Sliema kellhom xi ftit aktar mil-logħob u l-aktar li resqu qrib kien fl-24 minuta meta xutt ta’ Lydon Micallef ġie mxellef għal corner minn difensur tal-Lions bil-ballun jgħaddi jħakkek ma’ sieq il-lasta.
Fit-30 minuta Naxxar ħolqu l-aħjar azzjoni tagħhom bi cross ta’ Ito Yasukaze li deher jogħla tajjeb għalih l-attakkant Servo de Carvalho imma l-goaler Slimiż Rashed Al Tumi ppanċja minn fuq ras de Carvalho biex biegħed il-periklu.
Fit-tieni taqsima Sliema fetħu aktar aggressivi u fil-51 minuta Geoffrey Acheampong approfitta minn żball difensiv biex spara xutt minn qagħda xi ftit angolata iżda l-goaler Matthias Debono mblokka tajjeb it-tentattiv tal-plejer Slimiż.
Fit-62 minuta minn corner mogħti mill-istess Acheampong, Lydon Micallef ixxuttja ftit barra.
Acheampong reġa’ kien fl-azzjoni żewg minuti wara b’xutt mill-bogħod li Debono salva f’corner.
Sliema baqgħu jippressaw u fit-88 minuta kien mill-ġdid Debono li wettaq save spettakolari fuq freekick mogħti minn Neil Frendo.
Din kienet l-aħħar azzjoni tal-logħba bil-Lions jiksbu punt prezzjuz li prattikament jassigurahom milli jżommu posthom fl-ogħla diviżjoni.
Referee: Andrea Schriha
BOV Plejer tal-Logħba: Geoffrey Acheampong (Sliema W.)
