Il-kant-awtur ikoniku Taljan Gigi D’Alessio wasal f’Malta bi tħejjija għall-kunċert memorabbli li, mistennija jagħti flimkien mal-Orkestra Versatile, taħt id-direzzjoni tal-Maestro Paul Borg, is-Sibt fil-Malta Fairs and Conventions Centre, l-MFCC, f’Ta’ Qali.
Il-kunċert, li se jibda mis-7:30 ta’ filgħaxija, jagħmel parti mill-VERNALFestival, li hu appoġġjat minn VisitMalta.
D’Alessio hu meqjus bħala pilastru tax-xena mużikali Taljana, wara tliet diċenji ta’ suċċess kemm bħala kantant, kittieb, kompożitur, produttur tad-diski u showman.
Crew ta’ ONE News kien fl-Ajruport Internazzjonali ta’ Malta mal-wasla ta’ D’Alessio f’pajjiżna. Hu stqarr magħna x’jistgħu jistennew fil-kunċert l-ammiraturi tiegħu Maltin, waqt li faħħar lil pajjiżna.
Biljetti u aktar tagħrif dwar il-kunċert jistgħu jinkisbu minn fuq is-sit showshappening.com.
