Qormi Daikin rebħu s-Super Cup tal-Hockey sponsorjata mill-Għaqda Ġurnalisti Sport meta fil-finali għelbu lil Trust Payments Floriana Young Stars 3-1.
Kienet logħba ferm sabiħa u emozzjonanti biż-żewġ naħat viċin xulxin fl-ewwel tliet quarters sabiex fl-aħħar sbatax-il minuta u nofs kienu l-Qriema li skorjaw żewġ gowls importanti li bihom ħadu t-tazza.
Daniel Ellul kien poġġa lil Qormi Daikin minn fuq fl-ewwel quarter bi Floriana jirrispondu immedjatament permezz ta’ Anton Saliba.
Fit-tieni u t-tielet quarter ma sar ebda gowl sabiex fir-raba’ quarter, Qormi skorjaw żewġ gowls li għenuhom jirbħu din il-partita.
Juan Sarcia skorja t-tieni gowl b’Luke Bajada li minn kontrattakk għamilhom 3-1.
Fi tmiem il-konfront setgħu jibdew iċ-ċelebrazzjonijiet ta’ Qormi Daikin li laħqu l-qofol tagħhom mal-preżentazzjoni tat-tazza minn Robert Busuttil, membru fil-kumitat eżekuttiv fi ħdan l-Għaqda Ġurnalisti Sport lill-plejer ta’ Qormi Nathan Pace Gasan.
Qormi Daikin: Shamison Mifsud, Axel Cauchi, Shawn Dimech, Nathan Pace Gasan, Joseph Cuschieri, Clayton Gatt, Luke Bajada, Ayrton Falzon, Steve Tanti, Aaron Spiteri, Juan Sarcia, Julian Zahra, Daniel Ellul, John Williams, Keith Calleja, Kyle Micallef, Neil Spiteri Montebello, Luca Fsadni.
Trust Payments Floriana Young Stars: Marvin Grixti, Luke Borg Costanzi, Andrea Curmi, Julian Farrugia, Leon Gatt, Karl Chircop, Clive Williams, Anton Saliba, Deemer Rapinett, Justin Farrugia, Ali Rizwan, Nanko Cornelissen, Nathan Zammit, Verner Cachia, Andrew Camilleri.
Umpires: Alessandro Amore, David Agius.
