Wara ħasda inizjali, Floriana dawru telfa f’rebħa kbira ta’ 5-1 kontra Gudja United, biex b’hekk wara d-draw ta’ 1-1 li kisbu Hamrun Spartans kontra Valletta fil-jum ta’ qabel, issa jinsabu biss punt distakk mill-istess Spartans. Min-naħa l-oħra, wara din it-telfa, Gudja United, jidhru destinati u rassenjati li staġun ieħor jilagħbu fiċ-Challenge League.
Kienu Floriana li ħolqu l-ewwel periklu fid-19-il minuta meta xutt ta’ Carlo zammit Lonardelli mill-viċin ġie salvat b’diffikultá b’siequ minn mal-art mill-goalkeeper ta’ Gudja, James Pisani.
Iżda kienu Gudja li fetħu l-iskor fis-26 minuta meta Adian Jake Friggieri ra lill-goalkeeper Bulgaru tal-Greens Georgi Kitanov barra minn postu u permezz ta’ lob delizzjuz minn distanza ta’ madwar 30 metru ħasad għal kollox lill-istess Kitanov, biex irriżulta goal tal-istampi, u fost l-isbaħ goals ta’ dan l-istaġun sa issa.
Madankollu, Floriana ma rmewx ix-xugaman, anzi wettqu reazzjoni mill-aqwa u fit-33 minuta rebħu penalty meta Luca Gatt waqqa’ lil Kemar Reid fil-kaxxa. Mill-11-il metru, inkariga ruħu, l-ispeċjalista Willis Furtado, li ma żbaljax.
Huma komplew jiddettaw il-logħob u tliet minuti biss wara, qalbu l-iskor favurihom, meta l-istess Willis Furtado minn pożizzjoni angolata minn ġol-kaxxa tefa’ l-ballun fir-rokna tax-xibka, fost id-delirju ta’ ferħ tal-partitarji numerużi Furjaniżi.
Fil-ftuħ tat-tieni taqsima, il-Greens komplew fejn ħallew fl-ewwel waħda u ta’ dan ġew ppremjati permezz tat-tielet goal fl-47 minuta meta wara li rċeva minn cross mil-lemin, Kemar Reid, kien fil-post it-tajjeb fil-mument opportun u permezz ta’ xutt mill-viċin tefa’ ġewwa.
U jidher li huma ma kinux kuntenti biżżejjed b’dan l-iskor hekk kif fil-55 minuta skurjaw ir-raba’ goal permez ta’ daqqa ta’ ras mill-viċin tal-captain Oualid El Hasni.
70 MIN – FLR – Huma ssiġillaw ir-rebħa permezz tal-ħames goal fis-70 minuta meta Christos Rovas minn pożizzjoni ferm ideali tefa’ wara Pisani.
Floriana komplew jamministraw il-vantaġġ komdu li kellhom sa tmiem il-partita.
Referee: Ezekiel Barbara
BOV Plejer tal-Logħba: Willis Furtado (Floriana FC)
