Il-leaders tal-Kampjonat Premier Hamrun Spartans ġew miżmuma fid-draw ta’ mingħajr goals minn Sliema Wanderers minkejja li dawn tal-aħħar lagħbu l-aħħar nofs siegħa tal-konfront b’plejer anqas.
Iċ-ċampjins Hamrun kienu ġejjin minn serje fenomenali ta’ ħdax-il rebħa konsekuttiva filwaqt li Sliema kienu ġejjin minn rebħa ta’ 2-1 fuq Marsaxlokk.
Qabel il-logħba ġiet osservata minuta silenzju b’rispett għall-mewt tan-neputija tal-President ta’ Ħamrun S. Jospeh Portelli fil-ġranet li għaddew. Spikka wkoll ġest sabiħ tal-President ta’ Sliema W. Keith Perry li ppreżenta bukkett fjuri lill-President ta’ Ħamrun S. Joseph Portelli bħala solidarjeta mal-familjari tiegħu. Dan filwaqt li l-plejers ta’ Ħamrun S. daħlu fil-ground lebsin flokkijiet bojod.
L-ewwel taqsima kienet waħda diżappuntanti biż-żewġ naħat jonqsu li jkunu perikolużi lejn il-lasti avversarji.
Fit-tlettax il-minuta ħarba ta’ Uros Duranovic mix-xellug li avvanza fil-kaxxa, ixxutja żda tajjar b’diffikulta’ f’corner il-goalkeeper ta’ Sliema Rashed Al Tumi. Risposta ta’ Sliema seba minuti wara meta Geoffrey Acheampong għadda ballun għan-nofs lejn Henrique Bernardo Murillo li l-konklużjoni tiegħu ġiet imtajjra minn Henry Bonello biex l-ewwel taqsima intemmet 0 – 0.
Wara għaxar minuti logħob fit-tieni taqsima corner mil-lemin ta’ Roko Prsa ta’ Hamrun dirett lejn il-lasta, ballun li għadda ftit għoli. Sliema wieġbu fil-58 minuta b’xutt ċentrali ta’ Acheompong li mar ftit għoli.
Hamrun żiedu fir-ritmu u sekondi biss wara cross ta’ Duranovic mil-lemin, ballun għan-nofs għand Prsa li min quddiem il-lasta ra d-difiża slimiża ittajjarlu l-ballun. L-Spartans komplew jafsu u fil-63 minuta xutt minn barra l-kaxxa ta’ Luke Montebello ġie salvat minn Al Tumi.
Sekondi biss wara Sliema jispiċċaw b’għaxar plejers hekk kif tkeċċielhom Joseph Minala għat-tieni karta safra għall-foul fuq Jonny. Minn hawn il-quddiem Ħamrun tefgħu kollox fuq l-attakk pero Sliema iddefendew tajjeb u għalqu sew l-ispazji.
Lejn l-aħħar Hamrun kellhom żewġ okkażjonijiet oħra meta fit-82 minuta cross mix-xellug u daqqa ta’ ras ta’ Duranovic bil-ballun għadda ftit għoli u minuta mit-tmiem xutt b’saħħtu ta’ Ryan Camenzuli, ballun mal-lasta.
Referee: Ishmael Barbara
BOV Plejer tal-Logħba: Henrique Bernardo Murillo (Sliema W.)
