Floriana sfaw miżmuma fi draw diżappuntanti ta’ 2-2 minn Balzan, biex b’hekk issa d-distakk bejniethom u l-leaders Hamrun Spartans kiber għal ħames punti.
Kienu l-Greens li ħolqu l-ewwel periklu wara tmien minuti meta xutt mid-distanza ta’ Kemar Reid għadda għoli.
Floriana komplew jippressaw u mal-kwarta logħob rebħu penalty meta Willis Furtado twaqqa’ fil-kaxxa minn Prates ta’ Balzan. Mill-11-il metru inkariga ruħu l-istess Willis Furtado li ma żbaljax hekk kif permezz ta’ xutt fil-baxx tefa’ ġewwa.
Balzan wettqu reazzjoni tajba u fit-32 minuta, wara li rċieva minn pass preċiż, Jan Busuttil, minn pożizzjoni angolata, venven xutt minn ġol-kaxxa li ma ta l-ebda ċans lill-goalkeeper Bulgaru ta’ Floriana, Georgi Kitanov, bil-ballun jintemm fis-saqaf tax-xibka, biex b’hekk irnexxielu jsib ix-xibka proprju kontra l-ex tim tiegħu, u fil-fatt b’rispett ma feraħx wara dan il-goal.
Iżda Balzan ftit li xejn damu jifirħu hekk kif fil-45 minuta, il-Greens reġgħu qalbu l-iskor favurihom meta Matheus De Sousa kien fil-post it-tajjeb fil-mument opportun u minn taħt il-lasta tefa’ ġewwa. Fil-ħin miżjud, Floriana kienu għoddhom għamluhom tlieta meta Kemar Reid kellu t-tentattiv tiegħu minn daqqa ta’ ras mill-viċin jaħbat mal-wieqfa, qabel intemm barra, b’Balzan jeħilsuha ħafif.
Fil-ftuħ tat-tieni taqsima, Floriana, komplew fejn ħallew lejn tmiem l-ewwel waħda u fis-47 minuta, Dunstan Vella, kellu xutt kważi minn tarf il-kaxxa li għadda ftit għoli. Huma komplew jippressaw u żewġ minuti biss wara, Maksim Valadzko, ittanta xortih permezz ta’ xutt fil-baxx minn barra l-kaxxa, li iżda ntemm ftit barra.
Iżda Balzan wettqu reazzjoni tajba u ta’ dan ġew ippremjati meta fis-66 minuta ġabu l-iskor indaqs, meta minn azzjoni ta’ freekick, is-sostitut Dimeji Awosanja kellu xutt b’saħħtu salvat parzjalment minn Kitanov, biex mir-rebound daħal tajjeb Triston Caruana li minn taħt il-lasta tefa’ ġewwa.
Floriana tefgħu kollox fuq l-attakk u fil-ħin miżjud l-ex tal-partita Jake Grech kellu freekick insidjuż imdawwar f’corner mill-goalkeeper ta’ Balzan, Golovic.
Referee: Matthew Degabrielle
BOV Plejer tal-partita: Willis Furtado (Floriana FC)
