San Ġwann Pro Evolution Academy ħasdu lil-leaders tal-klassifika tal-Ewwel Diviżjoni tal-MAFA Swieqi Braves meta rebħulhom bl-iskor ta’ 1-0 f’logħba ferm intensiva iżda bilanċjata. Din ir-rebħa għenet lill-istudenti Franċiżi sabiex jersqu biss erba’ punti bogħod mill-quċċata filwaqt li rnexxielhom jirritornaw għar-rebħ. Min-naħa ta’ Swieqi, minkejja li ppruvaw xejn ma seta’ jiġihom tajjeb sabiex kellhom isofru t-tieni telfa staġjonali. Il-gowl li ddeċieda l-konfront ġie skorjat man-nofs siegħa logħob permezz ta’ Merouane Benabou. Referee kien Karl Stefan Galea.
Senglea Gunners komplew jitbiegħdu miż-żona tar-relegazzjoni meta ftit sabu diffikulta’ sabiex għelbu lil Valletta Stars St Dominic 3-0. It-tim mill-Isla skorjaw gowl fl-ewwel taqsima u żiedu tnejn oħra fit-tieni taqsima sabiex kisbu tliet punti ferm importanti. Juan Zarate poġġa lill-Gunners fil-vantaġġ wara 31 minuta logħob sabiex Aaron Selam għamilhom 2-0 fil-45 minuta. Anas Souhaile issiġġilla r-rebħa fid-59 minuta. Referee kien Lorry Sammut.
Fit-tieni diviżjoni, Attard Edex Kings telgħu fit-tieni post tal-klassifika meta għelbu lil Żebbuġ Youngsters 2-0. Edex Kings ma sabuhiex faċli jinfdu d-difiża ferm organizzata taż-Żebbuġin għalkemm din żammet sod sas-57 minuta meta Braham Garcia Espinosa poġġa lil Attard fil-vantaġġ sabiex Aaron Bryne skorja t-tieni gowl ħames minuti wara. Referee kien Gjorgji Bitri.
Mqabba Albions ġew miżmuma fi draw ta’ mingħajr gowls minn Gudja Wanderers. Dawn tal-aħħar iddefendew sa snienhom filwaqt li bdew itellgħu xi kontrattakki. Mqabba ippruvaw kemm felħu filwaqt li kienu żvinturati li laqtu l-lasta f’aktar minn okkażjoni waħda. B’dan id-draw, l-Albions jinsabu f’nofs il-klassifika filwaqt li Gudja qegħdin żewġ punti ‘l bogħod miż-żona l-ħamra li hi okkupata minn tliet timijiet. Referee kien Ray Tabone.
Fil-partitissima tat-tielet diviżjoni, Ħamrun Amateurs telgħu fl-ewwel post tal-klassifika meta għelbu lill-isfidanti għar-rebħ tat-titlu Ħal Far Titans 1-0. Wara skor ta’ 0-0 fl-ewwel taqsima f’logħba ferm difensiva, fit-tieni taqsima l-Ħamruniżi skorjaw il-gowl li ddeċieda l-logħba. Kien Joyfred Farrugia li rċieva tajjeb mil-lemin sabiex ħa vantaġġ minn rebound u xeħet il-ballun wara l-goalkeeper Gabriel Farrugia. Referee kien Ian Xuereb.
Għaxaq Wolves kisbu post fil-kwarti tal-finali tan-Next Auto Car Sales Ltd KO meta ftit sabu diffikulta’ sabiex jegħlbu lil Naxxar Victorians 4-0. L-Għaxqin skorjaw żewġ gowls f’kull taqsima u għalkemm Naxxar ippruvaw inaqqsu l-marġni tal-iskor, l-avversarji tagħhom kienu ferm sodi fid-difiża. Rodney Grixti poġġihom minn fuq fit-tmien minuta bl-istess plejer jirdoppja fis-36 minuta. Pablo Alvis fil-61 minuta u Jorge Carreno fis-66 minuta għaqqdu l-iskor għall-Wolves. Referee kien Jonathan Balzan.
