F’partita ferm emozzjonanti speċjalment fl-ewwel taqsima, Hibernians kisbu rebħa drammatika ta’ 3-2 kontra Gzira United.
Kienu proprju l-Pawlisti li ħolqu l-ewwel periklu fid-disa’ minuta meta freekick ta’ Artem Radchenko għadda ftit għoli.
Iżda kienu Gzira li fetħu l-iskor fis-26 minuta permezz ta’ xutt minn pożizzjoni ideali ta’ Thiago Espondola li ma ta l-ebda ċans lill-goalkeeper tal-Pawlisti, Hugo Sacco.
Madankollu, Hibernians ma rmewx ix-xugaman anzi wettqu reazzjoni mill-aqwa u ta’ dan ġew ippremjati meta żewġ minuti wara ġabu l-iskor indaqs meta minn azzjoni ta’ corner, minn rebound il-ballun spiċċa għand il-captain Bjorn Kristensen li mill-viċin spara ġewwa.
Il-partita kompliet tisbieħ u fit-33 minuta, il-Maroons reġgħu qalbu l-iskor favurihom meta Lucas Macula bir-ras niżżel il-ballun lejn iż-żagħżugħ Brooklyn Borg li minn taħt il-lasta, tefa’ ġewwa.
Hibernians reġgħu rreaġixxew tajjeb u tliet minuti wara reġgu ġabu l-iskor indaqs meta l-awtur tal-ewwel goal Bjorn Kristensen ipprovda l-assist lil Jurgen Degabrielle li permezz ta’ xutt fil-baxx għeleb għal kollox lill-goalkeeper ta’ Gzira, Darijan Zarkov, biex irnexxielu jsib ix-xibka għat-tieni partita konsekuttiva. Dan fost protesti ta’ Gzira hekk kif allegatament kien hemm foul fl-azzjoni li waslet għal dan il-goal, hekk kif Giannis Bastianos deher jimbotta lil Marcelo Dias.
Kien biss fil-75 minuta li waslet l-ewwel azzjoni denja ta’ nota fit-tieni taqsima, bil-Maroons ikunu huma li joħolqu l-periklu, meta Lucas Macula ttanta xortih permezz ta’ xutt fil-baxx minn pożizzjoni angolata li iżda ħareġ l-aħjar tal-goalkeeper żagħżugħ ta’ Hibernians, Hugo Sacco, li salva tajjeb minn mal-art.
Hibernians skorjaw il-goal ta-rebħa proprju fil-ħin miżjud meta ż-żagħżugħ Lucas Caruana wara li rċieva minn azzjoni ta’ freekick kien fil-post it-tajjeb fil-mument opportun u mill-viċin tefa’ ġewwa, fost id-delirju ta’ ferħ tal-partirarji numerużi tat-tim minn Raħal Ġdid.
Referee: Malcom Spiteri
BOV Plejer tal-Logħob: Jurgen Degabrielle (Hibernians FC)
