Wara ħasda inizjali, hekk kif sofrew goal kmieni fil-partita, Hamrun Spartans umiljaw lil Balzan meta għelbuhom bl-iskor kbir ta’ 7-1.
Kienu Balzan li fetħu l-iskor proprju fl-ewwel periklu li ħolqu fil-11-il minuta permezz ta’ xutt b’saħħtu ta’ Aleksandar Katanic li ntemm fis-saqaf tax-xibka.
Fid-19-il minuta, Hamrun, rebħu penalty meta Uros Duranocv twaqqa’ fil-kaxxa minn Triston Caruana. Mill-11-il metru inkariga ruħu Luke Montabello li ma żbaljax hekk kif permezz ta’ xutt fil-baxx tefa’ l-ballun naħa u lill-goalkepeer ta’ Balzan, Danilo Golovic, in-naħa opposta. Huma komplew jiddettaw il-logħob u fl-24 minuta, irduppjaw l-iskor meta f’azzjoni maħduma bizzilla, Uros Duranovic, venven xutt b’saħħtu li ma ta l-ebda ċans lil Golovic.
Il-kumplamment ta’ din it-taqsima kien ikkaraterizzat minn ħafna logħob f’nofs il-ground, fejn ma ġiet innutata l-ebda azzjoni oħra denja ta’ nota.
Hamrun ma kinux kuntenti biżżejjed b’dan l-iskor hekk kif fis-46 minuta proprju ftit sekondi wara l-ftuħ tat-tieni taqsima Uros Duranovic b’eleganza qabbeż il-ballun minn fuq Golovic, bil-ballun jintemm ġewwa, biex b’hekk irreġistra doppjetta personali u għamel l-iskor 3 – 1. Ftit anqas minn siegħa logħob u Hamrun żiedu ieħor meta cross mil-lemin wasal għand Luke Montabello li mill-viċin tefa’ ġewwa.
Hamrun skorjaw il-ħames goal fit-73 minuta meta s-sostitut Seth Paintsil kellu x-xutt mil-viċin tiegħu jaħbat mal-wieqfa, biex mir-rebound, Roko Prsa, tefa’ ġewwa. Mat-tokki ta’ disgħin minuta Hamrun ġew mogħtija penalty ieħor meta twaqqa fil-kaxxa Luke Montabello bl-stess plejer mill-11 il-metru ma’ jfallix.
Montabello bla dubju kien fil-vera forma għaliex fl-aħħar azzjoni tal-partita huqa ssiġilla ir-rebħa permezz ta’ xutt mill-viċin ma ħafirx, biex b’hekk irreġistra poker personali.
Referee: Philip Farrugia
BOV Plejer tal-Logħba: Luke Montabello (Hamrun)
