Floriana għelbu lil Santa Lucia bl-iskor ta’ 2-0, liema skor iżda meta wieħed iqis l-okkażjonijiet perikolużi li ħolqu tul id-90 minuta, seta’ faċilment kien ikbar favurihom.
Kienu Floriana li ħolqu l-ewwel periklu fil-11-il minuta meta cross-shot insidjuż mix-xellug ta’ Maksim Valadzko kważi ħasad lill-goalkeeper ta’ Santa Lucia, Francisco Da Paz Silva, bil-ballun finalment jintemm f’corner.
Floriana fetħu l-iskor fit-28 minuta meta Mattia Veselji approfitta minn żball fl-attakk ta’ Santa Lucia, u b’xamma kbira għall-goal, permezz ta’ xutt fil-baxx, spara l-ballun fix-xibka.
Dan il-goal provda injezzjoni morali lill-Greens li komplew fuq l-offensiva u ħames minuti wara Matheus de Sousa minn azzjoni ferm ideali tefa’ inkredibbilment barra.
Huma komplew jiddettaw il-logħob u fis-36 minuta l-iskorer tal-ewwel goal tal-Greens, Mattai Veselji, deher li allegatament twaqqa’ min difensur avversarju iżda r-referee Ishmael Barbara, ħalla l-logħob għaddej.
Fil-45 minuta Carlo Zammit Lonardelli xeħet cross lejn Mattia Vesslji bit-tentattiv tiegħu jiġi devjat f’corner minn difensur tal-Luċjani.
Mill-azzjoni li segwiet Zammit Lonardelli li kellu logħba mill-aqwa, venven xutt kważi minn tarf il-kaxxa li ġie salvat tajjeb minn Da Paz bl-skor sat-tmiem l-ewwel taqsima jibqa dak ta’ 1 – 0.
Fid-59 minuta, Matias Nicolas Garcia dejjem għall-Greens ittanta xortih permezz ta’ xutt mid-distanza li iżda ġie devjat f’corner mid-difiża ta’ Santa Lucia.
Kulma jmur kompla d-dominju assolut tal-Greens u fis-70 minuta Maksim Valadzko kellu x-xutt tiegħu salvat bi bravura minn Da Paz, biex ftit sekondi biss wara wara, Mattia Vesslji, kellu x-xutt tiegħu devjat f’corner mill-istess Da Paz.
Santa Lucia wieġbu għall-ewwel darba fit-73 minuta meta Aleksa Mrdja kellu x-xutt tiegħu mill-viċin salvat bi bravura mill-goalkeeper Bulgaru ta’ Floriana, Georgi Kitanov.
Floriana reġgħu ħolqu l-periklu fis-77 minuta meta xutt mid-distanza tas-sostitut u debuttant, Jake Grech, għadda għoli.
Huma rduppjaw l-iskor biex isiġillaw ir-rebħa fil-ħin miżjud meta s-sostitut Willis Furtado għadda tajjeb lejn is-sostitut l-ieħor Lorenzo De Grazia li minn pożizzjoni ideali tefa’ ġewwa.
Huma komplew jamministraw il-vantaġġ doppju li kellhom sa tmiem il-partita.
Referee: Ishmael Barbara
BOV Plejer tal-Logħba: Matthias Veselji (Floriana)
