Sirens irreġistraw l-ewwel rebħa ta’ l-istaġun meta għelbu lil Gudja United f’logħba li rat lil Gudja jiddominaw l-ewwel taqsima u meritatament jidħlu jistrieħu goal minn fuq. Iżda Sirens tjiebu wara l-mistrieħ u rnexxielhom idawru r-riżultat favur tagħhom biex ħadu t-tliet punti.
Gudja dehru l-aħjar fil-bidu u kellhom ċans tajjeb li jmorru fil-vantaġġ meta fis-17-il minuta ngħataw penalty għal foul fil-kaxxa tal-goalkeeper Andrea Cassar fuq Abou Toure. Kien l-istess Abou Toure li nkariga ruħu mill-penalty imma x-xutt tiegħu mill-11-il metru ġie salvat tajjeb mill-istess Cassar.
Madankollu fis-27 minuta Gudja fetħu l-iskor meta minn cross ta’ Sean Cipriott, Gabriel Mensah kompla l-ballun bir-ras għan-nofs u Abou Toure mill-qrib kompla għal ġewwa bir-ras.
Gudja komplew jagħfsu u fit-32 minuta Cassar salva b’diffikulta’ xutt minn barra l-kaxxa ta’ Shaisen Attard.
Erba’ minuti wara kienet il-lasta l-wieqfa li ċahhdet lil Abou Toure milli jirdoppja għal Gudja.
Fit-tieni taqsima reġgħu kienu Gudja li ħargu l-aħjar u fil-50 minuta xutt ta’ Armando Melo ġie salvat tajjeb mill-goalkeeper Cassar.
Iżda tliet minuti biss wara, Sirens ħolqu l-ewwel azzjoni denja li minnha skurjaw il-goal tad-draw. Kien Degran Jackson li temm ġirja fuq il-lemin bi kross tajjeb għan-nofs u s-sostitut Daniel Agius minn qagħda ideali tefa’ l-ballun fir-rokna tax-xibka.
Dan il-goal deher li ta ħajja ġdida lis-Sirens li resqu qrib li jmorru fil-vantaġġ fl-64 minuta meta minn kross ta’ Nicholas Pulis id-daqqa ta’ ras ta’ Mohammed Akadom ġiet salvata mill-goalkeeper Sozer.
Żewġ minuti biss wara Sirens rebħu penalty għal foul ta’ Shaisen Attard fuq Sacha Borg fil-kaxxa biex mill-11-il metru Kwasi Donsu ma falliex biex poġġa lit-tim minn San Pawl il-Bahar fil-vantaġġ.
Gudja ppruvaw iwettqu reazzjoni wara li sabu ruġhom minn taħt u fit-80 minuta kellu jkun il-goalkeeper Cassar li wettaq save mill-isbaħ biex ċaħħad lil Mango Mendes milli jagħmel l-iskor indaqs.
Referee: Ezekiel Barbara
BOV Plejer tal-Logħba: Daniel Agius (Sirens)
