‘Agħtuna t-Tazza, agħtuna t-Tazza’, għajtu l-mijiet ta’ partitarji ta’ Hamrun Spartans preżenti fl-Istadium Nazzjonali f’Ta’ Qali, hekk kif lejn nofs it-tieni taqsima kienu diġá aċċertati mir-rebħ tas-Super Cup għas-sitt darba minn sitt finali, meta kienu diġá tliet goals minn fuq, fejn Hamrun Spartans umiljaw lil Birkirkara, meta għelbuhom bl-iskor ta’ 4-0, bl-eroj assolut għall-Ispartans ikun Jonny, li rreġistra hat-trick personali.
B’hekk Hamrun wettqu tpottija sportiva kontra l-istess Birkirkara, hekk kif proprju nhar is-Sibt li għadda, kienu l-Istripes li għelbu lil Hamrun bl-iskor ta’ 3-0.
Kienu Hamrun li ħolqu l-ewwel periiklu fir-raba’ minuta meta Elionay Freitas Da Silva ttanta xortih permezz ta’ xutt minn barra l-kaxxa li intemm għoli. Huma komplew fuq l-offensiva u erba’ minuti wara Uros Duranovic għadda tajjeb lejn Jonny li kellu x-xutt mill-ewwel tiegħu jintemm ftit barra.
Kulma jmur kompla d-dominju assolut tal-Ispartans u ta’ dan ġew ippremjati meta fit-12-il minuta fetħu l-iskor meta JONNY kien fil-post it-tajjeb fil-mument opportun u b’xamma kbira għall-goal, tefa’ ġewwa.
.Hamrun komplew jippressaw u man-nofsiegħa logħob irduppjaw l-iskor meta reġa’ kien Uros Duranovic li pprovda l-assist lil JONNY li minn taħt il-lasta u b’logħob tat-tfal tefa’ ġewwa.
Birkirkara wieġbu għall-ewwel darba fit-43 minuta meta xutt mill-viċin ta’ Alex Satariano ġie mdawwar f’corner bi bravura mill-goalkeeper Taljan tal-Ispartans, Federico Marchetti.
Fil-ħin miżjud tal-ewwel taqsima, Hamrun, kellhom f’saqajhom il-ballun tat-tielet goal meta Luke Montebello mill-viċin ħareġ l-aħjar tal-goalkeeper Pollakk tal-Istripes, Marcel Zapytowski, li dawwar f’corner bi bravura.
Fil-ftuħ tat-tieni taqsima, Hamrun, komplew bl-istess ritmu tal-ewwel waħda u fit-62 minuta ssiġillaw i-rebħa permezz tat-tielet goal meta JONNY kellu x-xutt angulat tiegħu minn pożizzjoni ideali li ma ta l-ebda ċans lil Zapytowski.
Hamrun issiġillaw ir-rebħa permezz tar-raba’ goal fil-ħin miżjud meta EDERSON BRUNO DOMINGOS kellu x-xutt angulat fil-baxx tiegħu li ntemm fir-rokna tax-xibka.
Il-kumplament tal-partita kompla kkaratterizzat minn ħafna logħob f’nofs il-ground, b’Hamrun ikomplu jamministraw il-vantaġġ komdu li kellhom sa tmiem il-partita.
Wara l-partita, il-president tal-Malta FA, Bjorn Vassallo, ippreżenta s-Super Cup lill-captain ta’ Hamrun Spartans, Steve Borg.
