Raġel qiegħed jinżamm arrestat wara li aktar kmieni dalgodu pprova jisraq basket minn fuq mara. Minn informazzjoni li kiseb one.com.mt jidher li r-raġel pprova jaħtaf basket u ġakketta mingħand mara li kienet għaddejja bil-mixi fl-kwati tas-Swieqi. Żewġ uffiċjala ta’ Transport Malta li inzertaw kienu fuq il-post marru jassistu lill-mara bir-raġel irnexxielu jaħrab minn fuq il-post.
L-uffiċjala segwew lir-raġel sal-bidu ta’ Triq il-Kosta fejn hemhekk waslu wkoll numru ta’ uffiċjala oħra tat-TM. Ir-raġel ġie aggressiv ma’ dawn il-persuni u xi rġiel oħra li nzertaw kienu għadejjin mit-triq.
Huwa reġa pprova jaħrab billi qabeż f’għalqa mal-ġenb tat-triq madankollu huwa ġie miżmum sakemm waslu l-Pulizija tar-Rapid Intervention Unit li arrestawh u skattaw investigazzjoni fil-konfront tiegħu.
