Fil-Kroazja, il-Prim Ministru Robert Abela fuq stedina tal-President tal-Kunsill Ewropew Charles Michel, attenda għal laqgħa ma’ mexxejja oħrajn Ewropej, bi tħejjija għall-aġenda strateġika l-ġdida tal-Unjoni Ewropea li se tkopri s-snin bejn l-2024 u l-2029.
Waqt il-laqgħa, il-Prim Ministru Malti semma wħud mill-prijoritajiet għas-snin li ġejjin li huma ta’ importanza għal pajjiżna u li għandhom jiġu kkunsidrati fl-istrateġija l-ġdida, fosthom is-suq uniku, l-aċċess għall-mediċini, il-konnettività u l-Mediterran.
“Irridu nibdew, nemmen li l-ewwel u qabel kollox, li nirrikonoxxu realtajiet differenti ta’ stati membri differenti. Jien tkellimt, naturalment fil-kuntest tar-realtajiet ta’ pajjiżna li nemmen, li huma l-aktar speċifiċi mis-27 stat membru. Għaliex? Minħabba l-pożizzjoni ġeografika tagħna, minħabba l-fatt li aħna maqtugħin mill-mainland Ewropea, minħabba l-fatt ukoll li l-unika konnettività li għandna hi bl-ajru u bil-baħar. Mela, hemmhekk hemm ċerti realtajiet li l-liġijiet Ewropej iridu jieħdu konjezzjonijiet tal-fatt li aħna differenti minn stati membri oħrajn.”
Il-Prim Ministru tenna li, fir-rigward tas-suq uniku, għad hemm ċirkostanzi fejn ċerti pajjiżi, bħal Malta, li jibqgħu żvantaġġjati, fosthom fejn jidħol l-aċċess għall-mediċini u l-konnettività.
Dr Abela saħaq li għalkemm pajjiżna qed ikompli jġib mediċini ta’ kwalità bi prezz affordabbli, l-Unjoni Ewropea għandha tindirizza l-isfida tal-aċċess għall-mediċini biex tassew ikollna suq uniku għall-farmaċewtika.
“Din l-istess realtà tkellimt dwarha fil-kuntest tas-suq tal-mediċini, li r-realtà tas-suq tal-mediċini f’pajjiżna, li għandek ċerti mediċini li addirittura mhumiex disponibbli, jew jekk huma disponibbli huma bi prezz kważi tliet darbiet ogħla minn dak li ssibu fi bliet kapitali Ewropej oħrajn, minħabba d-daqs tas-suq tagħna.”
Dwar ir-reġjun tal-Mediterran, il-Prim Ministru saħaq li dan għandu ħafna potenzjal u għandu jingħata l-importanza li jistħoqqlu. Għaldaqstant issuġġerixxa li għandu jkun hemm Kummissarju Ewropew għall-Mediterran.
Qabel din il-laqgħa, il-Prim Ministru Robert Abela kellu wkoll laqgħa bilaterali mal-Prim Ministru Kroat, Andrej Plenković, fejn komplew jibnu fuq id-diskussjoni tal-laqgħa bilaterali li kellhom f’Malta f’Settembru li għadda.
“Kienet laqgħa interessanti ferm, fejn iddiskutejna wkoll ir-realtajiet ta’ pajjiżna. Għandna relazzjoni diplomatika mill-aktar kordjali, hemm interessi u valuri komuni wkoll.”
Dwar il-viżjoni strateġika għall-ħames snin li ġejjin, Dr Abela temm billi awgura li l-konklużjonijiet minn din il-laqgħa jwasslu biex titħejja direzzjoni strateġika li tkun msejsa fuq ir-realtà, li tkun ambizzjuża.
“Nemmen però li għandna ħames snin eċċitanti quddiemna wkoll, sfidi persważ li mhux se jkunu qed jonqsu, imma nemmen li l-viżjoni korretta qegħda hemmhekk.”
