Id-diskors tal-Prim Ministru t-Tlieta filgħaxija fil-Parlament kien wieħed b’saħħtu b’aħbarijiet sbieħ marbuta ma’ investiment multi-miljunarju, deċiżjonijiet favur serħan il-moħħ kontra żvilupp u anki roħs fil-mediċini.
Id-diskors tal-Prim Ministru kien għalkollox differenti minn dak tal-Kap tal-Oppożizzjoni Bernard Grech.
Fuq kollox Dr Abela kkoreġa lil Grech li anki l-bażiku ġab ħażin.
Qal, Il-bieraħ il-Kap tal-Oppożizzjoni qalilna: tkomplux tidħku bin-nies fuq is-sussidji tal-enerġija. Ħa ngħidlek Sur President min jidħak bin-nies. Min imur il-Lussemburgu u jgħidilhom li qed jixtri d-diesel b’orħos milli jixtrih f’Malta. 40 ċenteżmu l-litru ogħla minn Malta, id-diesel fil-Lussemburgu. Jekk tgħolli l-enerġija taf x’ikun Sur President ir-riżultat? Li l-middle class tkissirha, u li l-klassi t’isfel tgħaffiġha; hekk kif ġara qabel l-2013 eżatt.”
Il-Prim Ministru nnota l-politika tal-awsterità li għadha tħaddan l-Oppożizzjoni.
Qal, “U mela, Sur President, ma kienx hemm lilna min qalilna li l-Gvern missu jikkonsidra li jnaqqas is-sussidji fuq il-kontijiet tal-enerġija. Mela ma kienx hemm min qalilna li aħna l-iktar Gvern fl-Ewropa li qed ngħinu fis-sussidji tal-enerġija. U mela ma kienx hemm ukoll min qalilna “Imma almenu għax ma tnaqqsuhomx ftit ftit ħalli d-defiċit tqaċċtuh malajr u jkollna numru li jogħġbu lill-Unjoni Ewropea?” Imma meta ġejt mistoqsi dawn id-domandi, jiena dort mal-ewwel fuq il-prinċipji tiegħi. Aħna lilna x’jinteressana l-aktar; in-numri, li nidhru sbieħ mal-Ewropa jew il-qagħda tal-familji tagħna? Jien jinteressani mill-qagħda tal-familji tagħna. U mela li nidher sabiħ mal-Ewropa. Dik inħalliha għal min juża lil Malta għall-avvanz tal-karriera personali tiegħu fl-Ewropa.”
Il-kelliem għall-finanzi tal-Oppożizzjoni Jerome Caruana Cilia, responsabbli mal-Kap mill-fjask tal-pre-budget document tas-sena l-oħra u dis-sena mal-Kap preżenta erba’ slides kien kiteb hekk, kif spjega l-Prim Ministru Robert Abela.
Qal, “Qalilna li qabel l-2013 Malta kellha a successful economic plan based on cautious steady growth. L-uniku ħaġa cautious dakinhar taf x’kienet? L-għajnuna li kienu jagħtu lin-nies. L-unika ħaġa steady ta’ dakinhar kienet l-awsterità u l-growth kienet xi ħaġa kważi ineżistenti. Staġnar kellna fi żmienhom, staġnar.”
Il-Prim Ministru rrimarka għall-politika ta’ investiment fin-nies u biex l-aqwa opportunitajiet f’pajjiżna jaħtfuhom iż-żgħażagħ Maltin u Għawdxin.
Qal, “Għalhekk il-budget li ressaqna ġimgħa ilu huwa budget li jħares għal-lum, imma wkoll għal għada. Is-suċċess trid tibnih kull sena u ma tibżax u ma tispoponiex ir-riformi u l-bidliet li jridu jsiru. Għalhekk, le għall-awsterità imma iva għall-investiment.”
