Ġiet fi tmiema kampanja ta’ tindif fil-baħar, f’inizjattiva mwettqa mill-Aquaculture Resources Limited, il-fergħa operattiva tal-Federazzjoni tal-Produtturi tal-Akwakultura ta’ Malta (FMAP), li wriet għal darba oħra l-impenn tal-industrija lejn ir-responsabbiltà soċjali u amministrazzjoni ambjentali.
Id- direttur ta’ ARL, Dr Charlon Gouder qal li dan huwa pass eqreb li kull sena jitjiebu l-isforzi ta’ tindif fl-ibħra mal-kosta Maltija.
ARL ikkummissjonat żewġ timijiet ta’ bastimenti apposta għat-tindif, mgħammra b’għodda ta’ tindif marittimu, kif ukoll RHIBs biex ikollhom aċċess għal spazji żgħar mal-kosta, sabiex jimmonitorjaw medda kbira tal-kosta Maltija, mill-Mellieħa fit-Tramuntana sa’ Wied iż-Żurrieq.
Dawn iż-żewġ timijiet, dgħajjes kbar mgħammra bi tliet ħaddiema kull wieħed, irċievew rapporti li ppermettulhom jieħdu azzjoni immedjata fuq kważi kull forma ta’ żibel fil-baħar: tim ħa ħsieb in-naħa tat-Tramuntana mill-Mellieħa sal-Belt Valletta, filwaqt li dik tan-Nofsinhar kompliet mill-breakwater tal-Belt Valletta għal Wied iż-Żurrieq.
Iż-zibel miġbur miż-żewġ timijiet kien jinkludi rifjtut ġġenerat minn attivitajiet industrijali jew żibel mis-sajd rikreattiv.
Dan iż-żibel li jammonta għal iktar minn nofs tunnellata kuljum ta’ żibel kif ukoll 45kgs ta’ żejt kuljum – kien jinkludi diversi plastiks, pallets tal-injam, skart organiku, kif ukoll żjut tal-bċejjeċ tal-baħar.
Bl-użu ta’ xbieki tal-musulina speċjali, dawn id-dgħajjes ġabru dan iż-żejt mill-baħar, billi jagħlquh bl-użu ta’ booms, u mbagħad jiġbruh. Fil-każ ta’ oil spills iżjed imferxin, l-ARL ikkuntattjat lil Transport Malta biex isir l-irkupru immedjat ta’ dan iż -żejt.
ARL ikkollaborat wkoll mal-NGO tat-tindif Żibel dwar rapporti ta’ tixrid taż-żejt qrib Buġibba, li għenet lit-timijiet ta’ tindif ta’ ARL biex iwettqu rkupru immedjat minn kmieni filgħodu, ta’ żejt mormi ftit sigħat qabel ma daħal ir-rapport.
It-tuna pens tal-FMAP, li jinsabu 5 kilometri ‘l bogħod mill-kosta tal-Mellieħa, jiġu spezzjonati regolarment mill-ERA kull ġimgħa. Din is-sena, l-ARL ġabret ukoll kwalunkwe prodott sekondarju mill-proċess tal-għalf tat-tonn li jista’ jiġġenera l-hekk imsejjaħ “sea slime”.
Dan it-tip ta’ xkuma huwa prodott bijodegradabbli li jiġi ġġenerat mill-għalf — ta’ spiss kavalli jew is-sardin — li jingħata lit-tonn fil-gaġeġ. Il-konċentrazzjoni ta’ dan l-ikel fil-gaġeġ ta’ spiss tiġġenera kurrenti qawwija hekk kif it-tonn jgħum għalih. Madankollu, huwa minnu wkoll li wara l-maltempati, jista’ jifforma tip ta’ ragħwa naturali meta kurrenti qawwija jtellgħu l-alka mill-qigħan, li bin-nutrijent tagħhom jixxerred b’mod naturali. Fil-fatt, fis-snin preċedenti anki l-ERA rrikonoxxiet l-impatt tal-alka blu-aħdar li bir-ragħwa tipika tagħha hija magħrufa bħala “sea snot”.
Huwa fatt magħruf, u dan anke minħabba l-wirt tal-Mellieħa stess fis-sajd tat-tonn, li t-tonn selvaġġ ifittex kenn qrib dawn il-kosti, u f’każijiet rari, jimxi aktar ‘il ġewwa fl-ilmijiet interni.
Dr Charlon gouder tenna li l-ARL dejjem lesta tagħmel il-parti tagħha u qal li jittamaw li jkunu aktar proattivi ma’ dawk ta’ rieda tajba li huma attivi fit-tindif tal-kosti u l-ibħra tagħna.
