Floriana waqqgħu l-ewwel punti dan l-istagun meta kellhom jikkuntentaw bi draw ta’ 1-1 ma’ Naxxar Lions, f’loghba li ghalkemm iddominaw għal ħinijiet twal, naqsu li japprofittaw mis-supremazija li kellhom għal draw li bla dubju kkuntenta l-aktar lit-tim Naxxari.
Floriana fetħu fuq l-attakk u ħolqu l-ewwel periklu appena għaddew 60 sekonda meta x-xutt imkaxkar ta’ Nogureira ġie salvat mill-goalkeeper Matthias Debono.
Fl-10 minuta minn azzjoni ta’ corner, id-daqqa ta’ ras ta’ El Hasni ġiet salvata mill-istess Debono.
Naxxar wieġbu b’kontrattakk żewġ minuti wara iżda x-xutt ta’ Servo de Carvalho ftit li xejn inkwieta lill-goalkeeper Furjaniz Georgi Kitanov.
Floriana baqgħu aktar avventurużi u fl-24 minuta rega’ kien Nogureira li x-xutt tiegħu ġie salvat minn Debono.
Iżda fit-33 minuta Floriana fetħu l-iskor meta xutt ta’ Adam Magri Overend ġie mblukkat mid-difiża tal-Lions, iżda Dunstan Vella minn pożizzjoni ċentrali fajjar xutt li għeleb lil Debono u spiċċa fix-xibka.
Immedjata kienet ir-reazzjoni ta’ Naxxar li skurjaw il-goal tad-draw fil-35 minuta meta ballun illobbjat ta’ Tahuma Yagamuchi qarraq bil-goalkeeper Kitanov u spiċċa fix-xibka.
Għalkemm baqgħu jagħfsu għall-kumplament ta’ l-ewwel taqsima, il-greens ma rnexxielhomx ikunu perikolużi sal-mistrieħ.
Floriana fetħu t-tieni taqsima fuq l-attakk u resqu qrib fit-48 minuta permezz ta’ Kemar Reid li x-xutt tiegħu ġie salvat parzjalment mill-goalkeeper Debono biex id-difiża kklerjat b’diffikulta’.
Fis-60 minuta Valadzko xeħet kross għan-nofs imma ma sab lil ħadd mill-attakkanti Furjaniżi seta’ jikkonkludi.
Naxxar kienu perikolużi fil-65 minuta b’xutt angolat ta’ De Souza li Kitanov imblokka tajjeb.
Fit-72 minuta Floriana ntroduċew lil Kyrian Nwoko flok Matias Garcia u kien l-istess Nwoko li minuta wara xeħet ftit għoli minn qagħda tajba wara kross tajjeb ta’ Kemar Reid.
Fit-80 minuta kien Edson Cenqueira li ttanta xortih għal Naxxar b’xutt li Kitanov salva b’diffikulta’ f’corner.
Inutli kien l-ahhar sforzi ta’ Floriana bid-difiża tal-Lions tikkontrolla tajjeb sat-tmiem.
Referee: Darryl Agius
Plejer tal-Loghba: Dunstan Vella (Floriana)
