Lejliet il-partita ta’ kwalfikazzjoni mill-Kampjonati Ewropej 2024 bejn l-Italja u Malta, l-kowċ tat-tim nazzjonali Malti Michele Marcolini flimkien mad-difensur Enrico Pepe indirizzaw lill-media lokali u dik internazzjonali f’Stadio San Nicola f’Bari fejn ingħataw l-aħħar dettalji dwar l-iskwadra Maltija u x’qed nistennew mill-partita kontra lis-stess Italja.
Marcolini sostna li l-partita kontra l-Italja se tkun waħda diffiċli għalkemm jinsab ottimist li l-plejers ser jagħtu l-mija fil-mija tagħhom sabiex ir-riżultat ikun wieħed diċenti. Il-kowċ Taljan sostna li minkejja li jaf li ħa jkun hemm ħinijiet fejn it-tim se jkun taħt pressjoni, it-tim huwa kompatt u se jaħdmu bħala grupp sabiex flimkien u mhux individwalment joħorġu minn kull sitwazzjoni li se tiġi quddiemhom.
Il-partita ta’ għada se tkun waħda emozzjonanti għal stess Marcolini hekk kif fil-karriera tiegħu l-kowċ ta’ Malta lagħab għal xejn anqas minn 4 snin ma’ Bari fejn kif qal lis-stess kowċ, f’Bari għandu ħafna ħbieb u memorji sbieħ.
Marcolini sostna li bla dubju s-sittin elf persuna li mistennija jattendu għal partita żgur se jkunu qed joħolqu pressjoni sabiex l-Italja tirbaħ il-konfront.
Fuq lis-stess linja ta’ ħsieb kompla Pepe fejn qal li Malta se tkun qed tilgħab ma’ wieħed mill-aqwa nazzjonijiet fid-dinja iżda hu u l-plejers sħabu jinsabu preparati sabiex jagħtu l-mija fil-mija matul id-disgħin minuta.
Marcolini kellu kliem ta’ tifħir ukoll għal kompatrijot tiegħu, l-kowċ tat-tim nazzjonali Taljan Luciano Spalletti fejn sostna li huwa kowċ ta’ livell għoli ħafna u l-Italja, taħt it-tmexxija tiegħu se tkompli tagħmel passi l-quddiem kif wara kollox għamlet taħt it-tmexxija ta’ Roberto Mancini.
Mistoqsi dwar l-kundizzjoni tal-plejers Jodi Jones u Teddy Teuma li ma’ vjaġawx mal-skwadra peresli jinsabu imweġgħin, Marcolini kkonferma li jinsabu f’kuntatt kontinwu mal-klabbs rispettivi taż-żewġ plejers sabiex jevalwaw is-sitwazzjoni tagħhom qabel il-partita ta’ nhar it-Tlieta li ġej kontra l-Ukrajina fl-Stadium Nazzjonali f’Ta’ Qali.
Wara l-konferenza tal-aħbarijiet l-iskwadra Maltija tħarġet għal aħħar darba qabel ma’ għada Malta taffaċja l-qawwa tal-Italja fil-20.45 f’logħba oħra minn Grupp C tal-kwalifikazzjoni Ewropeja 2024.
