Fi Spazju Kreattiv il-Belt Valletta, ġiet imnedija t-tlettax-il edizzjoni tal-Festival tal-Arti għat-Tfal u ż-Żgħażagħ, ŻiguŻajg.
L-edizzjoni li se titella’ bejn l-10 u d-19 ta’ Novembru se tkun l-ewwel waħda li se titella’ b’mod normali wara l-pandemija b’sittax il-attività differenti, kif spjegat id-Direttriċi tal-Festival ŻiguŻajg, Marta Vella.
“Programm imżewwaq b’ħafna forom kreattivi differenti minn opra għal żfin għal teatru fiżiku u anki għal plays li jsejħulhom straight plays. Xi ħaġa għal kulħadd ħa jkun hemm żgur. Għandna xejn inqas minn sittax-il event u għandna kemm kumpaniji lokali kif ukoll internazzjonali li ħa jiġu u jkunu parti mill-Festival.”
Marta Vella – Direttriċi ta’ ŻiguŻajg
Dan il-programm estensiv mmirat għal tfal ta’ ftit xhur sa adoloxxenti ta’ tlettax-il sena, se jkun qed jittella’ f’postijiet differenti madwar il-Belt Valletta stess.
Rupert Cefai, iċ-Chairman ta’ Fondazzjoni Kreattività li taħtha jaqa’ dan il-festival, innota li ŻiguŻajg huwa uniku fil-prodott li joffri għaliex qiegħed jinvesti fi produzzjonijiet għall-udjenzi tal-futur.
“Li jagħmel dan il-festival speċjali huwa li litteralment qed ninvestu fl-udjenzi tal-futur tagħna għax ħafna min-nies li sena wara sena jispiċċaw jiġu f’dan il-festival jispiċċaw ikunu udjenzi tas-settur artistiku. Imma wkoll li dan il-festival jgħodd bħala ispirazzjoni għall-futur.”
Rupert Cefai – Chairman tal-Fondazzjoni Kreattività
Minn naħa tiegħu, il-Ministru għall-Wirt Nazzjonali, l-Arti u l-Gvern Lokali, Owen Bonnici faħħar din l-inizjattiva, li issa saret appuntament annwali fil-kalendarju artistiku ta’ pajjiżna filwaqt li ħeġġeġ lill-ġenituri sabiex jieħdu t-tfal taghħom jaraw il-prestazzjonijiet li se jittellgħu.
“Li jkollok festival tant tajjeb, tant b’saħħtu bi programm li jaħseb għal kulħadd, jaħseb għall-inklużjoni, hija xi ħaġa li tagħmel ġieħ lil Spazju Kreattiv u m’għandix dubju li l-pubbliku, l-familji Maltin u Għawdxin se japprezzaw immens dak li għandna lest għalihom f’dan it-tlettax-il edizzjoni ta’ ŻiguŻajg.”
Owen Bonnici – Ministru
Il-booking għall-attivitajiet huwa miftuħ u wieħed jista’ jikseb aktar informazzjoni minn fuq is-sit ziguzajg.org.
