Maria Baldacchino bdiet il-ħidma tagħha bħala l-Membru Nazzjonali l-ġdid għal Malta fil-Eurojust dan ix-xahar, hi qed tieħu post Philip Galea Farrugia. Baldacchino diġà serviet bħala Deputat Membru Nazzjonali minn Settembru 2021, filwaqt li kienet qed taħdem bħala avukat fl-Uffiċċju tal-Avukat Ġenerali fil-Belt Valletta u ilha taħdem fil-Eurojust bħala Assistent tal-Membru Nazzjonali minn Marzu 2020.
F’kummenti dwar il-ħatra tagħha bħala Membru Nazzjonali, Baldacchino qalet: “Onorata u eċitata li nħtart bħala l-Membru Nazzjonali għal Malta fil-Eurojust. Impenjata li naħdem bla heda flimkien mal-kollegi tiegħi biex insaħħaħ il-kooperazzjoni internazzjonali fil-ġlieda kontra l-kriminalitàtranżnazzjonali u nippromwovi l-valuri tal-ġustizzja u s-sigurtà fl-Ewropa u lil hinn minnha.”
Baldacchino ggradwat fil-liġi mill-Università ta’ Malta f’Novembru 2018 u rċeviet il-warrant tagħha biex taħdem bħala avukat f’Settembru 2019. F’Jannar 2020, hija ngħaqdet mal-Uffiċċju tal-Avukat Ġenerali ta’ Malta, u ħadmet fi ħdan l-Unità tal-Affarijiet Internazzjonali u Kriminali. F’din il-kapaċità, Baldacchino ffukat prinċipalment fuq kwistjonijiet relatati mal-estradizzjoni u talbiet għal Assistenza Legali Reċiproka.
F’Diċembru 2022, kisbet Masters fil-Liġi fil-Kriminoloġija u l-Ġustizzja Kriminali mill-University of London. Matul is-snin, il-Membru Nazzjonali l-ġdid għal Malta attendiet diversi konferenzi dwar il-kriminalità tranżnazzjonali u l-ġustizzja kriminali, tirrappreżenta l-Uffiċċju tal-Avukat Ġenerali barra minn Malta.
