Tliet ġimgħat qabel jiġi ppreżentat il-Budget 2024, il-Prim Ministru Robert Abela kellu l-ewwel minn sensiela ta’ laqgħat ta’ konsultazzjoni dwar il-Budget 2024.
Matul laqgħa mal-Kamra tal-Kummerċ fil-Berġa ta’ Kastilja, il-Prim Ministru wera l-impenn tal-Gvern li se jibqa’ jieħu d-deċiżjonijiet li hemm bżonn. Saħaq li bħalma ttieħdu d-deċiżjonijiet meħtieġa fil-konfront tal-linja nazzjonali tal-ajru, hekk ukoll il-Gvern se jibqa’ jieħu deċiżjonijiet importanti oħra fl-interess ta’ Malta.
Irrefera għat-tkabbir ekonomiku ta’ pajjiżna, b’Malta tibqa’ tkun eċċezzjoni fost ekonomiji tal-pajjiżi Ewropej. Qal li dan ir-ritmu ekonomiku jrid jinżamm biex kulħadd igawdi minn dan it-tkabbir.
Il-Prim Ministru nsista li ma jistgħux jittieħdu deċiżjonijiet mingħajr ma jkun hemm diskussjoni. Għamel referenza għad-deċiżjoni riċenti dwar il-bidla fl-istipendji. Riforma mifruxa fuq perjodu ta’ tliet snin li se tara t-tisħiħ tal-istipendji bil-għan li aktar studenti jagħżlu suġġetti li jwassluhom għal karriera. Saħaq li kulħadd ikollu opinjoni, iżda finalment trid tittieħed deċiżjoni, u d-deċiżjoni ttieħdet.
Hawnhekk Dr. Abela ħeġġeġ għal diskussjoni miftuħa mar-rappreżentanti tal-Kamra tal-Kummerċ u qal li l-punt tat-tluq jibqa’ wieħed, it-twemmin fil-potenzjal ta’ Malta u ta’ niesha.
Temm jgħid li b’diskussjoni u t-teħid ta’ deċiżjonijiet f’waqqithom, igawdu l-Maltin u l-Għawdxin tal-lum u ta’ għada.
