Wara ħasda inizjali, Gzira United dawru telfa f’rebħa ta’ 6-1 biex b’hekk kisbu l-ewwel rebħa tal-istaġun. Dan filwaqt li Gudja United għadhom mingħajr rebħa.
Gudja United fetħu l-iskor proprju fl-ewwel periklu li ħolqu fis-16-il minuta meta Gabriel Mensah kellu freekick mill-isbaħ li ma ta l-ebda ċans lil Darijan Zarkov li f’din il-partita kien qed jilgħab għall-ewwel darba bejn il-lasti Gżirjani fejn ħa post David Cassar.
Gzira wieġbu fl-24 minuta permezz ta’ konklużjoni sabiħa minn ġol-kaxxa ta’ Marcelo Dias li kien qed jilgħab proprju kontra l-ex team tiegħu, u li ġiet devjata f’corner mid-difiża ta’ Gudja.
Huma komplew jippressaw u fid-29 minuta Ewertton indirizza cross lejn Lucas Macula li nqala’ tajjeb mill-markament ta’ difensur avversarju u permezz ta’ daqqa ta’ ras sabiħa ra t-tentattiv tiegħu, jintemm ftit barra.
Il-Maroons ġabu l-iskor indaqs fil-35 minuta meta minn azzjoni maħduma bizzilla, Andy Borg għadda pass twil u intelliġenti lejn Gabriel Bohrer Mentz li bir-ras waqqa’ l-ballun lejn Lucas Macula, li minn pożizzjoni ferm ideali tefa’ ġewwa, b’dan ikun l-ewwl goal tiegġu matul dan l-istaġun.
Minuta bis wara huma qalbu l-iskor favurihom meta Zachary Scerri għadda pass fit-tul u preċiż lejn Adama Sane li avvanza tajjeb u b’eleganza liema bħalha qabbeż il-ballun minn fuq il-goalkeeper ta’ Gudja, Yaren Somer.
Fil-agahftuħ tat-tieni taqsima, Gzira komplew bl-istess ritmu tal-ewwel waħda u fis-47 minuta Marcelo Dias avvanza tajjeb fuq il-lemin qabel xeħet cross fil-baxx li sab lil Adama Sane li mill-viċin tefa’ l-ballun f’lasta vojta, biex b’hekk irreġistra doppjetta personali.
Huma komplew jiddominaw għal kollox il-partita u fit-72 minuta rebħu penalty meta James Arthur waqqa’ lis-sostitut Brooklyn Borg fil-kaxxa. Mill-11-il metru, inkariga ruħu id-difensur Brażiljan Gabriel Bohrer Mentz li tefa’ l-ballun naħa u lil Somer in-naħa opposta.
Gzira skorjaw il-ħames goal fit-88 minuta meta Thaylor Aldama fetaħ tajjeb lejn Brooklyn Borg li minn taħt il-lasta tefa’ ġewwa, b’dan ikun l-ewwel goal tiegħu fil-Kampjonat Premier.
Kien imiss goal ieħor Gżirjan fit-92 minuta, meta Thaylor Aldama rċieva l-ballun minn rebound u b’opportuniżmu leima bħalu tefa’ l-ballun f’lasta vojta.
Referee: Ezekiel Barbara
BOV Plejer tal-Logħba: Marcela Dias (Gzira U.)
