Valletta u Mosta temmew il-konfront ta’ bejniethom fi draw ġust ta’ 1-1, b’dan ikun it-tieni draw konsekuttiv bl-istess skor miksub minn Valletta, wara dak ta’ nofs il-ġimgħa kontra r-rivali, Birkirkara.
Kienu Valletta li ħolqu l-ewwel perikluwara sitt minuti. Brandon Paiber ittanta xortih permezz ta’ xutt minn barra l-kaxxa, li iżda ntemm ftit għoli.
Mosta fetħu l-iskor fil-21 minuta permezz tal-ex tal-partita, Kevin Tulimieri, li spara xutt mid-distanza li ma ta l-ebda ċans lill-goalkeeper tal-Lilywhites, Jake Galea.
Il-Beltin tilfu ċans tad-deheb li jġibu l-iskor indaqs fid-29 minut meta xutt ta’ Paiber ġie salvat minn Akpan li iżda ma żammx, bil-ballun jintemm għand Federico Falcone li minn taħt il-lasta, tefa’ inkredibbilment barra.
Mosta kważi rduppjaw l-iskor fid-39 minuta, meta minn freekick mogħti mill-captain Claytin Failla, il-ballun deher destinat għal ġox-xibka, iżda Neil Micallef irriżulat bħala l-eroj għall-Beltin, meta bi bravura rnexxielu jtajjar il-ballun minn fuq il-linja fatali.
Fil-45 minuta, Brandon Paiber kien sfortunat li ma ġabx l-iskor indaqs meta sab lill-goalkeeper ta’ Mosta, David Udoh Apkan attent, wara xutt fil-baxx mid-distanza.
Fil-ftuħ tat-tieni taqsima, Valletta ħarġu ferm aggressivi u resqu viċin li jġibu l-iskor indaqs fil-50 minuta, meta Vega indirizza cross lejn Falcone li kellu d-daqqa ta’ ras tiegħu mill-viċin, tintemm ftit barra.
Iżda Valletta finalment ma kellhomx jiġu mċaħħda, erba’ minuti wara meta l-ispeċjalista, Brandon Paiber, inkariga ruħu minn freekick mill-isbaħ li ma ta l-ebda ċans lil Akpan.
Mosta resqu ferm viċin li jergħu jaqilbu l-iskor favurihom fil-65 minuta, iżda kienu sfortunati meta Nnaji kellu l-konklużjoni tiegħu minn taħt il-lasta li stampat mal-mimduda, bil-Beltin jeħilsuha ħafif.
Valletta wieġbu minuta biss wara, meta wara li cross mil-lemin, Falcone ġiegħel lil Akpan joħroġ l-aħjar tiegħu billi wettaq save tajjeb.
Fit-82 minuta, kien imiss li Valletta li jolqtu l-lasta meta din id-darba, l-awtur tal-uniku goal għalihom, Brandon Paiber kellu xutt mill-isbaħ li ħabat mal-wieqfa, biex ġie mċaħħad milli jirreġistra doppjetta personali fil-partita.
Erba’ minuti wara, Linus Precious Tenebe għal Mosta kellhu daqqa ta’ ras mill-viċin li ġiet salvata tajjeb minn Jake Galea.
Valletta tilfu ċans tad-deheb ieħor li jiskorjaw il-goal tar-rebħa fid-90 minuta, meta Garba wara li rċieva mingħand Vega, minn ġol-kaxxa kellu x-xutt b’saħħtu b’saħħtu tiegħu li għadda għoli.
U d-drama kienet għada ma spiċċatx hawn, meta fil-ħin mogħti żejjed, Akpan irriżulta bħala l-eroj assolut tal-Blues, meta salva ż-żewġ xuttijiet mill-viċin tas-sostitut, Jhonnattann Benites Da Conceicao
Referee: Glen Tonna
BOV Plejer tal-Logħba: Brandon Paiber (Valletta FC)
