Kellu jkun goal ta’ Aleksandar Katanic kmieni fil-partita eżattament fl-14-il minuta, li ta rebħa minima ta’ 1-0 lil Balzan kontra Santa Lucia.
Din kienet it-tieni rebħa konsekuttiva għal Balzan u t-tielet telfa konsekuttiva għal Santa Lucia, li għadhom ankrati fil-qiegħ tal-klassifika mingħajr ebda punt.
Balzan għal ftit ma skorjawx it-tieni gowl ħames minuti minn tmiem l-ewwel taqsima meta minn free-kick ta’ Leandro Da Silva, il-goalkeeper ta’ Santa Lucia Celio Da Paz Silva salva tajjeb biex l-ewwel taqsima intemmet 1 – 0.
Santa Lucia resqu viċin fl-64 minuta meta Golovic salva tajjeb corner perikoluż ta’ Sven Xerri biex fil-80 minuta tentattiv ta’ Steve Pisani għal Santa Lucia ġie devjat mid-difiża ta’ Balzan.
Fl-aħħar mumenti tal-partita Santa Lucia verament viċin il-gowl tad-draw meta konklużjoni tas-sostitut Nagamatsu għaddiet ftit barra.
Referee: Fyodor Zammit
BOV Plejer tal-Logħba: Aleksa Andrejic (Balzan)
