Is-Segretarju Ġenerali tal-Partit Nazzjonalista, Michael Piccinino, ħareġ jipprova jgiddeb lid-Deputat Ivan Bartolo. Il-MaltaToday, fil-ħarġa tal-Ħadd, irrapportat li waqt laqgħa tal-Grupp Parlamentari Nazzjonalista, Ivan Bartolo, ikkonfronta lil Bernard Grech u qallu li l-Partit kien ilu ġimgħat b’informazzjoni dwar il-każ tal-abbuż tal-benefiċċji soċjali.
Filwaqt li ma daħalx f’dettall, Ivan Bartolo kkonferma mal-MaltaToday li tkellem dwar dan is-suġġett fil-Grupp Parlamentari. Għalkemm ma riedx jikkummenta iżjed minn hekk.
Fuq Facebook, is-Segretarju Ġenerali Piccinino ħareġ jattakka lill-MaltaToday biex indirettament jipprova jimmina lil Bartolo. Qal li l-MaltaToday għamlet gidba biex tagħti kredibbiltà lill-Prim Ministru Robert Abela.
Il-MaltaToday rrapportat it-tweġiba ta’ Piccinino ma’ nota li fiha ntqal li xorta qed iżżomm mar-rapportaġġ oriġinali tagħna.
F’dan ir-rapportaġġ intqal kif Bernard Grech talab lid-deputati tiegħu biex ikunu aktar voċiferi u hawn ġie ffaċċjat minn Ivan Bartolo. Bartolo qal lill-Grupp li hu kien ilu li informa lill-Partit b’ċerta informazzjoni dwar il-każ tal-benefiċċji soċjali, iżda baqa’ ma sar xejn.
Minn dak irrapportat jirriżulta li din kienet deċiżjoni strateġika minħabba l-biża’ tal-involviment ta’ deputati tal-Partit Nazzjonalista fejn fil-kurituri tal-Istamperija qed jissemmew ċerti ismijiet b’persistenza.
Jidher li ċerti deputati kkonfrontaw lil Bernard Grech dwar ir-raġuni għalxiex baqa’ fommu sieket, waqt li hu ddefenda ruħu billi qal li ma kellux provi fuqiex jitkellem.
Wara li l-istorja kienet żvelata riżultat ta’ laqgħa tal-Grupp Parlamentari kollha leaks, Piccinino issa pprova jbenġilha, filwaqt li bagħat messaġġ indirett ukoll lil Ivan Bartolo billi uża l-attakk fuq il-MaltaToday.
