Minkejja li kienu l-aktar tim li ħoloq azzjonijiet ta’ periklu, Gudja United kellhom jikkuntentaw b’draw ta’ mingħajr goals fit-tieni partita tal-Ħadd filgħaxija fl-Stadium Nazzjonali kontra Mosta FC.
It-tim immexxi minn Jesmond Zammit ħoloq l-ewwel periklu fil-18 il-minuta meta l-konklużjoni ta’ Neil Tanbone spiċċat barra. Sekondi biss wara Matias Muchardi ta’ Gudja fajjar xutt li l-goalkeeper Mosti Akpan Udoh salva.
Ir-risposta ta’ Mosta waslet man-nofs siegħa logħob b’konklużjoni tal-captain Zachary Brincat li pero ġiet salvat mil-goalkeeper ġdid ta’ Gudja Yaren Sozer bl-ewwel taqsima tintemm 0 – 0.
Gudja komplew fuq lis-stess ritmu u mal-bidu tat-tieni taqsima kienu għal darba oħra perikolużi din id-darba permezz ta’ Gabriel Mensah li x-xutt tiegħu ġiet devjat minn Gustavo Chara ta’ Mosta biex eventwalment id-debutant fil-lasta ta’ Mosta Akpan Udoh salva.
Fil-67 minuta kontrattakk veloċi maħdum bizzilla bejn Abou Toure, Mirko Esposito u Gabriel Mensah bix-xutt b’saħħtu ta’ dan tal-aħħar ikun devjat f’corner.
Erba minuti minn tmiem il-konfront, Aliyu Isah għal Mosta kellu xutt minn barra l-kaxxa li għadda ftit għoli.
Referee: Daryl Agius
BOV Plejer tal-Logġba: Matias Muchardi (Gudja U.)
