Birkirkara kellhom jitħabtu biex għelbu l-isfida tan-neo-promossi ta’ Sliema Wanderers bl-iskor minimu ta’ 1-0. Kienet partita li setgħet tmur kull naħa bi Sliema joffru oppożizzjoni denja lil-Istripes, hekk kif dehru tattikament ferm organizzati f’kull dipartiment tal-ground. Dan kollu jindika li l-Wanderers, għalkemm għadhom kemm ġew promossi mill-BOV Challenge League se jkunu għadma iebsa għal kull team li se jkun qed jaffrontahom.
L-ewwel taqsima kienet ferm kwieta u nieqsa minn kull emozzjoni, b’din tkun kemmxejn nervużi b’fouls kemmxejn perikolużi miż-żewġ naħat.
Fl-ewwel nofsiegħa tal-partita, Sliema, kellhom iktar minn dak li jirrigwardja pussess tal-ballun. Madankollu, Birkirkara bdew iżidu fir-ritmu tal-logħob tagħhom u kienu huma li ħolqu l-ewwel azzjoni perikoluża fit-33 minuta meta minn azzjoni ferm veloċi, Queiroz de Jesus kellu x-xutt fil-baxx tiegħu jiġi salvat tajjeb minn mal-art mill-goalkeeper tal-Wanderers, Rashed Al Tumi.
Sliema wieġbu fil-45 minuta permezz ta’ daqqa ta’ ras ta’ Freire li għaddiet ftit barra.
Fil-ftuħ tat-tieni taqsima kienu Birkirkara li ħarġu fuq l-offensiva meta Adailton Queiros de Jesus li kien f’poażizzjoni ideali, ma laqatx għal ftit xutt angulat ta’ Yannick Yankam.
Sliema wieġbu fit-62 minuta meta Geoffrey Edwin Achemapong għadda tajjeb lejn Denis Kouao Christ Damsen li kellu x-xutt tiegħu salvat b’diffikultá mill-goalkeeper Pollakk tal-Istripes, Marcel Zapytowksi.
Iżda kienu Birkirkara li fetħu l-iskor fit-68 minuta meta Adailton Queiros de Jesus għadda tajjeb lejn Alex Satariano li min-naħa tiegħu xeħet cross għan-nofs li ġie mxellef minn Jean Borg qabel intemm għand ANDREI CIOLACU li minn taħt il-lasta ixxamplat tefa’ l-ballun f’xibka vojta.
Huma komplew jippressaw u fis-76 minuta, is-sostitut Adailton Queiros de Jesus kellu xutt insidjuża li ġie salvat minn Rashid Al Tumi, bil-ballun b’xi mod jerġa’ jintemm għand l-istess player li kellu x-xutt tiegħu mid-distanza jintemm ftit għoli.
Birkirkara komplew jamministraw il-vantaġġ minimu li kellhom sa tmiem il-partita, bi Sliema jagħmlu minn kollox biex jippruvaw jinfdu lid-difiża avversarja, li iżda dehret ferm kumpatta u organizzata u annullat għal kollox l-isforzi tal-Wanderers.
Referee: Malcolm Spiteri
BOV Plejer tal-Logħba: Geoffrey Edwin Acheampong (Sliema W.)
