Fil-lejl ta’ bejn il-Ġimgħa u s-Sibt seħħ terremot qawwi fil-Marokk, li f’inqas minn erbgħa u għoxrin siegħa diġà ħalla aktar minn elf persuna mejta, waqt li mijiet oħrajn indarbu.
It-terremot seħħ għall-ħabta tal-ħdax ta’ filgħaxija, ħin lokali u kellu qawwa ta’ 7.2 fuq l-Iskala Richter fejn affettwa l-aktar il-villaġġi fir-reġjun muntanjuż Atlas. Anke l-belt storika ta’ Marrakech intlaqtet ħażin ħafna.
Dan ħalla eluf kbar ta’ persuni bla saqaf fuq rashom, waqt li bliet spiċċaw bla dawl u servizzi bażiċi, waqt li parti sew mill-infrastruttura nqerdet kompletament.
ONE News tkellem mad-Deputat Laburista Edward Zammit Lewis, li bħalissa flimkien ma’ qrabatu jinsabu għal btala f’dan il-pajjiż. Huma jinsabu qawwijin u sħaħ. Huma kienu f’Marrakech din il-ġimgħa u allura fost l-aħħar li rawha fuq saqajha.
“Konna nafu b’żewġ familji oħra li kienu Marrakech, ikkuntattjajniehom ukoll, jinsabu safe u jidher li hemm moviment ta’ nies, turisti speċjalment, li qed jiġu lejn it-tramuntana. Jiġifieri qed jiġu lejn in-naħa ta’ Tangier fejn hawnhekk imbagħad għandek konnettività bl-ajru l-Ewropa.”
Huwa nnota s-sitwazzjoni kif inhi f’dan il-pajjiż u l-biżgħa li ħakmet lin-nies, minkejja li jinsabu kilometri ’l bogħod minn fejn ġara t-terremot.
“Però s-sitwazzjoni ġenerali jidher li l-Marokkini ovvjament inkwetati għax kienu, skont ma tkellimt magħhom ukoll, kien terremot ta’ ċertu ‘magnitude’, li ilhom għexieren ta’ snin ma jesperjenzawh, f’pajjiż li rrid ngħid qed jimxi ħafna bħala pajjiż fl-Afrika ta’ Fuq anke fejn jidħol żvilupp ekonomiku u ta’ infrastruttura.”
Sorsi mill-Ministeru għall-Affarijiet Barranin ikkonfermaw ma’ ONE News li ħdax-il Malti għamlu kuntatt mal-Konsulat ta’ pajjiżna fil-Marokk, fejn fortunatament ħadd minnhom ma ndarab.
ONE News jinsab infurmat ukoll li dawn il-persuni se jirritornaw lura lejn pajjiżna l-Ħadd, waqt li oħrajn għaddejjin b’arranġamenti biex jiġu lura nhar it-Tnejn.
Minn filmati li jinxterdu fuq il-midja soċjali ħareġ ukoll li mijiet ta’ persuni fi bliet madwar il-pajjiż minnufih irrikorrew għall-appelli biex jagħtu d-demm fl-għajnuna lil dawk midruba.
Bosta rreaġixxew għal din l-aħbar traġika, fosthom il-Prim Ministru Malti Robert Abela, fejn f’kitba fuq il-midja soċjali, wassal messaġġ ta’ solidarjetà lejn il-poplu Marokkin u tenna li l-ħsibijiet tal-poplu Malti mal-pajjiż Afrikan.
Il-President ta’ Malta George Vella, f’kitba fuq il-midja soċjali wkoll esprima n-niket tiegħu għal din l-aħbar.
