Intervent f’waqtu minn uffiċjali tas-salvataġġ tal-Forzi Armati ta’ Malta, salva l-ħajja ta’ raġel li nqabad f’mewġ qawwi mal-kosta f’Tas-Sliema.
Il-każ seħħ it-Tlieta filgħodu u fuq Facebook ġie spjegat kif iċ-Ċentru Malti għall-Kordinazzjoni tas-Salvataġġ, daħlitlu talba għall-għajnuna dwar raġel fil-baħar fl-inħawi ta’ Tignè.
Immedjatament, iċ-ċentru bagħat l-għajnuna ta’ diversi taqsimiet, fosthom ħelikopter tal-Forzi Armati ta’ Malta u anke l-opra l-ġdida tad-Dipartiment tal-Protezzjoni Ċivili msejħa Manuċċa.
Wara li ġie lokalizzat ir-raġel, l-ekwipaġġ tal-ħelikopter tal-Armata rnexxielu jsalvah. Il-persuna ngħatat ukoll l-għajnuna medika minn tim mill-Isptar Mater Dei li wasal fuq il-post biex jassisti.
L-uffiċjal li ddendel mill-ħelikopter u salva lir-raġel hu l-Istaff Sergeant u Helicopter Rescue Swimmer James Borg.
Fl-isfond tal-ħelikopter, li assista fuq ix-xena tas-salvataġġ, Borg spjegalna, f’kumment esklussiv ma’ ONE News, dak li esperjenza t-Tlieta filgħodu għall-ħabta tal-għaxra … f’aċċident li seta’ kellu konsegwenzi ferm aktar serji.
Qal “Dak il-ħin rajna persuna qiegħed jissielet fil-baħar fil-mewġ. Tkellimna mal-crew dak il-ħin stess, iddeċidejna li rescuer minna jinżel fuq il-blat ħalli jkun jista’ jagħti l-assistenza lili x’ħin inkun nieżel. Inżilt, irbatt il-pazjent malajr kemm jista’ jkun, u hemmhekk kif rajt li qiegħed marbut sew, tajt is-sinjal lill-winchman biex inkunu nistgħu ntellgħuh fil-ħelikopter f’post sigur.”
L-awtoritajiet Maltin qed iwissu dwar riħ qawwi u maltemp fil-jiem li ġejjin, għaldaqstant l-appell biex kulħadd iżomm ’il bogħod mill-kosta u b’hekk jiġu evitati aċċidenti bla bżonn.
Qal “F’dawn il-mumenti, il-baħar ikun wisq imqalleb u perikoluż, u allura importanti, u nagħmel appell lin-nies iżommu kemm jista’ jkun siguri ħalli nevitaw perikli bħalma ġara llum.”
