Il-Bank of Valletta għadu kif aġġorna l-iskrins tal-ATMs mferxa madwar il-pajjiż, fejn fuqhom qed juri wiċċ ġdid, aġġornat u faċli biex jintuża.
L-aġġornamenti saru bil-għan li tiżdied l-aċċessibbiltà, u tagħmilha ferm aktar faċli li jitwettqu t-tranżazzjonijiet li l-klijenti huma tant familjari magħhom.
Aktar minn 650 skrin issa ġew aġġornati, inklużi l-iskrins kollha tal-kards ta’ kreditu kif ukoll kards lokali oħra, biex b’hekk jiġi żgurat li l-interazzjonijiet tal-klijenti jkomplu jiżviluppaw f’esperjenza aktar moderna.
Il-Bank żamm intatt il-fluss minn skrin għall-ieħor, sabiex il-klijenti jkomplu jużaw l-ATMs bl-istess mod li huma mdorrijin bih.
Matul ix-xhur li għaddew il-Bank of Valletta kien qed jinvesti ħin u enerġija biex itejjeb is-servizz offrut.
Dan isir b’mod strutturat permezz tal-programm Voice of the Customer. Fil-fatt, il-Bank jikseb informazzjoni regolari dwar il-livell ta’ sodisfazzjon tal-klijenti bis-servizzi u prodotti tiegħu, filwaqt li jidentifika oqsma fejn ikun bżonn ta’ attenzjoni.
L-aħħar informazzjoni miksuba relatata mal-ATMs tal-Bank diġà rriżultat f’titjib sostanzjali. Il-Bank kien biddel il-ħin ta’ servicing tan-netwerk tal-ATM tiegħu, introduċa r-riċiklaġġ tad-depożiti għal ġbid ta’ flus kontanti u beda jintbagħat ukoll SMS lill-utenti biex javżahom meta ATM li tintuża b’mod regolari ma tkunx qed toffri is-servizz mistenni.
