Wara nuqqas ta’ 18-il sena, Hermann Bonaci se jkun qed jingħaqad għal darb’oħra ma’ ONE, bi programm ġdid fl-iskeda l-ġdida li tibda minn Ottubru li ġej
Infatti, Hermann se jkun qed jippreżenta programm ġdid bl-isem ”L-IMGĦODDI LLUM” fejn matulu ser ikun qed jintervista bosta personalitajiet li sawru snin twal ta’ xandir għall-istazzjonijiet ONE.
Dawk li llum huma wċuħ familjari, dawk li llum temmew il-karriera televiżiva tagħhom, dawk li b’xi mod taw kontribut fl-istorja tal-istazzjonijiet ONE, preżentaturi, produtturi, tekniċi, announcers, ġurnalisti u dj’s se jkunu fost il-mistiedna ewlenin ta’ Hermann fejn lkoll ser jirrakkuntaw l-esperjenzi tagħhom ma’ ONE f’din il-produzzjoni rikka b’ ritratti u filmati esklussivi.
Għaliex l-Imgħoddi llum?
Forsi mhux kulħadd jiftakar lil Simone Cini bħala l-ewwel newscaster feminili ta’ ONE News, jew forsi mhux kulħadd jiftakar il-programm ta’ siegħat twal li Ray Azzopardi kien jippreżenta l-Ħdud wara nofsinhar jew pereżempju s-sehem importanti li Alfred Zammit kellu tul dawn is-snin ta’ xandir b’lealtà lejn is-segwaċi ta’ ONE. Dawn u ħafna aktar se jkunu l-mistiedna, ir-rakkonti u l-esperjenzi li Hermann Bonaci se jwassal waqt il-programm ġdid ”L-Imgħoddi llum”
”Ninsab eċitat ħafna ħafna li wara ammont ta’ snin nieqes, se nerġa’ nkun fuq ONE bi programm ġdid. Nirringrazzja ħafna lis-segwaċi leali ta’ dan l-istazzjon u niltaqgħu f’Ottubru li ġej”
HERMANN BONACI
Hermann huwa veteran fix-xandir lokali, bi snin twal ta’ esperjenza. Apparti bi produzzjonijiet tad-drama, bl-aktar ewlenin, is-Soap Opera Maltija IPOKRITI u s-sitcom SIMPATIĊI, Hermann ħa sehem f’bosta sensiliet u ppreżenta bosta programmi, fosthom għal snin twal fuq ONE il-programm magazine FLIMKIEN li kien iwassal ma’ Frida Cauchi u bosta kollegi oħra.
