Nhar il-Ħamis, erbgħa u għoxrin ta’ Awwissu, għexieren ta’ eluf ta’ Maltin u turisti mistennija jimlew il-Fosos tal-Furjana għall-kunċert ta’ Robbie Williams.
L-artist ġgant, li kien sab il-fama l-ewwel mal-band Britannika Take That, u wara bħala artist solista, żied lil Malta fit-tour Ewropew tiegħu, bl-isem XXV, biex jiċċelebra karriera ta’ ħamsa u għoxrin sena jkanta waħdu. Hu mistenni jagħti prestazzjoni mill-aqwa fuq il-Fosos tal-Furjana l-Ħamis li ġej.
It-tour Ewropew ta’ Williams beda bi spettaklu f’Bologna, l-Italja, u se jara lill-artist jagħti kunċerti oħrajn fi bliet kbar fil-kontinent, fosthom Pariġi, Amsterdam u Berlin, biex imbagħad jitlaq lejn l-Ażja u l-Awstralja.
Il-kunċerti se jinkludu wħud mill-aqwa kanzunetti ta’ Williams, fosthom “Angels”, “Let Me Entertain You”, “Millennium”, “Rock DJ”, “Feel” u “She’s The One”.
Dan l-istazzjon tkellem ma’ Alexia Camilleri, Assistant Manager fi ħdan l-Awtorità Maltija għat-Turiżmu, l-MTA.
“Kif appena tħabbar dan l-avveniment fil-bidu ta’ din is-sena, kien hemm ħafna interess kemm lokali u anke internazzjonali, fejn fosthom, saret ħafna promozzjoni internazzjonali biex inżidu l-interess tat-turisti barranin li jkunu jistgħu jagħżlu lil Malta għall-btala tagħhom.”
Alexia Camilleri – Assistant Manager tal-MTA
Hi tkellmet dwar il-prestiġju li artist bħal Williams jagħżel lil Malta u l-interess qawwi li mill-ewwel attira dan il-kunċert.
“Għal dan l-avveniment qed nistennew għexieren ta’ eluf ta’ persuni biex jattendu fuq il-Fosos tal-Furjana, magħruf ħafna ma’ avvenimenti oħrajn ta’ prestiġju li attiraw numru ta’ artisti internazzjonali.”
Alexia Camilleri – Assistant Manager tal-MTA
Dan il-kunċert hu wieħed minn kullana ta’ festivals u attivitajiet li saru s’issa dan is-sajf, u baqa’ xi jsiru, biex jimlew il-kalendarju sajfi Malti ta’ attivitajiet li jagħtu pjaċir mhux biss lit-turisti, imma anke lill-Maltin u lill-Għawdxin.
“Bdejna l-kalendarju tas-sajf billi kellna l-Wine and Food Festival fejn iffokajna fuq esperjenza kulturali, imxejna wkoll għall-BBC Orchestra fejn iċċelebrajna l-mitt sena taċ-ċelebrazzjonijiet ta’ Hollywood. Kien hemm l-Isle of MTV fejn kellna diversi artisti internazzjonali, kellna wkoll SummerDaze u Glitch, li attiraw numru ta’ DJs internazzjonali, u issa qed nistennew dan il-kunċert li se jsir fl-24 ta’ Awwissu fejn ovvjament l-antiċipazzjoni hi qawwija ħafna kemm mill-Maltin kif ukoll mill-barranin.”
Alexia Camilleri – Assistant Manager tal-MTA
Lil hinn mill-kunċert ta’ Robbie Williams, avvenimenti kbar oħrajn ippjanati huma l-festa ta’ mħabba tal-EuroPride 2023 f’Settembru u anke l-Airshow – kollha avvenimenti li jagħtu valur miżjud lit-turisti li jiġu Malta u lill-Maltin li jesperjenzaw avvenimenti kbar f’pajjiżhom stess.
