Newcaslte United huma r-rebbieħa tal-ewwel edizzjoni tas-SELA Cup li kienet preżentata minn Visit Malta.
Il-Ħadd intlagħbet it-tieni u l-aħħar ġurnata tas-SELA Cup fejn fl-ewwel partita Fiorentina rebħu 2 – 1 kontra Nice filwaqt li fit-tieni konfront Newcaslte United rebħu 4 – 0 kontra Villareal.
Fiorentina marru fil-vantaġġ fis-sbatax il-minuta meta kien Christian Kouname li tefa’ ballun l-quddiem u Luca Jovic b’xutt fil-baxx tefa’ l-ballun wara l-goalkeeper Kasper Schmeichel.
Ma’ ftit aktar minn nofs siegħa logħob Fiorentina kabru l-iskor meta wara taħwida fil-kaxxa l-ballun spiċċa għand Christian Kouama li minn taħt l-lasta spara fix-xibka għal 2 – 0.
Ħames minuti mit-tmiem Nice naqsu l-margini meta kien Badredina Bounani li wara li avvanza kellu xutt bid-dawra minn barra l-kaxxa li spiċċa wara l-goalkeeper Pietro Terracciano.
Fit-tieni partita, Newcastle ħadu biss ħames minuti biex skorjaw l-ewwel gowl tal-partita kontra Villareal.
Kienet azzjoni ta’ free-kick wara ħames minuti ta’ Matt Richie, li ġiet klerjata, bil-ballun spiċċa għand Jacob Murphy li b’xutt b’saħħtu minn tarf il-kaxxa poġġa lill-Magpies fil-vantaġġ.
Newcastle għamluhom tnejn mas- siegħa logħob meta kien Callum Wilson li qassam l-ballun lill-Joelinton li għadda mal-ewwel lejn Harvey Barnes li b’xutt b’saħħtu minn ġol-kaxxa xeħet l-ballun fix-xibka biex skorja l-ewwel gowl tiegħu bil-kuluri ta’ Newcastle.
Kwarta mit-tmiem u Newcastle skorjaw t-tielet gowl tagħhom meta Joelington irċieva ballun f’nofs grawnd, qabeż plejer avversarju avvanza u b’xutt mill-isbaħ minn barra l-kaxxa tefa’ l-ballun fix-xibka.
Tlett minuti wara u Newcastle għamluhom erbgħa, meta f’attakk ieħor kien Callum Wilson li minn ġol kaxxa tefa’ kross fil-baxx li sab eżatt lill-Harvey Barnes li b’xutt għar-rokna tefa’ fix-xibka u skorja t-tieni gowl tiegħu fil-partita. Skor finali ta’ 4 – 0.
Wara l-partita Newcastle United kienu preżentati bis-SELA CUP, preżentazzjoni li saret mil-Kap Eżekuttiv ta’ Newcastle United Darren Eales u l-Kap Eżekuttiv tal-Awtorita’ Maltija tat-Turiżmu Carlo Micallef.
Ritratt: Domenic Aquilina
