L-aħħar tħejjijiet għall-Ballu tal-Qamar ta’ Awwissu jinsabu fl-aqwa tagħhom.
Dan il-ballu, li se jiġi organizzat fil-ġonna tal-Palazz tal-Verdala, fir-Rabat, fis-sigħat li ġejjin, għandu storja twila fejn diversi persuni jingħaqdu flimkien f’serata sabiħa ta’ ikel u divertiment, b’turija ta’ solidarjetà mal-Malta Community Chest Fund Foundation, li tgħin eluf ta’ persuni matul is-sena kollha.
Żorna l-post fejn it-tħejjijiet ilhom li bdew ħafna qabel biex dawk li jattendu jkollhom lejl mill-isbaħ bl-ifjen platti u nbejjed Maltin.
Il-ballu ta’ din is-sena, li għalih mistennija jattendu ħames mitt persuna, hu l-ħames wieħed organizzat taħt il-patroċinju tal-President tar-Repubblika George Vella.
Dwar il-ballu tkellimna maċ-Chairman tal-Kumitat Organizzattiv tal-Ballu tal-Qamar t’Awwissu, il-Markeżin Daniel De Petri Testaferrata, li qal li dan il-ballu ilu jsir minn żmien il-Gvernaturi Ingliżi.
Hu żied jgħid li l-ħsieb wara l-ġurnata li fiha ssir is-serata hu li jkun l-aktar Sibt qrib qamar kwinta, biex dak li jkun igawdi d-dawl sabiħ tal-qamar fuq wieħed mill-isbaħ Palazzi fil-gżejjer Maltin.
“L-August Moon Ball kien marbut mal-qamar. Illum m’għadux. Din is-sena kumbinazzjoni, vera l-qamar kwinta kien proprju ftit tal-jiem ilu, allura b’hekk il-ballu se jsir ftit jiem wara l-ewwel l-qamar kwinta.”
De Petri Testaferrata qal li l-għażla tal-Verdala tmur paripassu mas-skiet tal-Imdina u l-madwar, u ż-żiffa ħelwa li jkun hemm f’dawn l-inħawi.
“Il-ballu huwa parti integrali mill-attivitajiet li torganizza l-Malta Community Chest Fund Foundation u nħarsu lejn dan l-avveniment bħala xi ħaġa tradizzjonali. Il-fatt li nerġgħu ngħixu dan iż-żmien ħelu fil-post fejn il-Kavallieri kienu jgħixu għal btala fis-sajf.”
Waqt li radd ħajr lil dawk kollha involuti fl-organizzazzjoni tal-Ballu tal-Qamar ta’ Awwissu għall-ħidma tagħhom fl-aħħar ħames snin, il-President Vella awgura li l-edizzjoni ta’ din is-sena tkun għal darb’oħra suċċess bħalma kienu l-oħrajn.
Il-President fakkar li dan l-avveniment, li issa daħal sew fil-kalendarju Malti, hu wieħed mill-ikbar avvenimenti li jsiru matul is-sena biex jinġabru fondi għall-Malta Community Chest Fund Foundation.
