Il-Gvern qed iħares lejn aktar inċentivi biex jiddirezzjona l-investiment u l-għażliet f’Għawdex lejn il-ħarsien tal-qalba tal-irħula u l-ambjent naturali, fost oħrajn.
Dan biex anke jibni fuq inizjattivi eżistenti bħall-iskemi b’saħħithom għax-xiri ta’ proprjetajiet f’żona ta’ konservazzjoni urbana, dik magħrufa bħala UCA.
Tkellem dwar dan il-Prim Ministru, Robert Abela, meta ltaqa’ ma’ seba’ organizzazzjonijiet Għawdxin li jaħdmu fuq l-inizjattiva ‘Għal Għawdex’ biex, magħhom, jiddiskuti proposti li qed jagħmlu għall-gżira.
Filwaqt li kien hemm biex jisma’ l-proposti, il-Prim Ministru tkellem dwar is-suċċess ta’ Għawdex fl-aħħar snin u kif ir-realtà llum inbidlet, tant li Għawdex sar mutur u mhux aktar mażżra, fl-istess ħin li wieħed irid jieħu ħsieb il-ħarsien ta’ dak li jagħmel Għawdex uniku.
Hawn Dr Abela spjega li meta l-Gvern għażel li, għal Għawdex, jagħmel skemi aktar ġenerużi, għal dawk li jridu jirriabilitaw u jirrestawraw djar kien qed jibgħat sinjal ċar.
Il-Prim Ministru Abela qal li issa fuq dak is-sinjal, il-Gvern irid jibni l-inizjattivi l-ġodda, liema inizjattivi jkunu jixhdu kif ilkoll flimkien jieħdu ħsieb lil Għawdex.
Il-Prim Ministru żied jgħid li l-baġit li ġej irid jagħti sinjal ieħor dwar dan ukoll, waqt li rrefera għall-proġett kbir ta’ spazju miftuħ li jrid isir fil-qalba tar-Rabat.
Huwa ħeġġeġ lis-seba’ organizzazzjonijiet biex jieħdu sehem fil-konsultazzjoni pubblika li għaddejja dwar dan il-proġett ukoll, għax dan irid ikun wieħed mill-proġetti ewlenin li jġibu bidla kbira f’Għawdex.
Dan il-proġett iħares lejn ir-riġenerazzjoni ta’ żona sħiħa mifruxa fuq medda ta’ aktar minn 22,000 metru kwadru. Ċentrali għal din il-viżjoni hu l-fatt li ż-żona, li llum hi okkupata minn parkeġġ, tiġi ttrasformata fi spazju miftuħ u aċċessibbli għal kulħadd.
Il-Prim Ministru Robert Abela nnota wkoll id-deċiżjoni li Ħondoq ir-Rummien għandu jibqa’ mhux mittiefes u spjega li l-Gvern, b’mod konsistenti, bagħat messaġġ kontra l-iżvilupp fuq din l-art verġni.
Għal-laqgħa kienu preżenti l-Kunsill Reġjonali Għawdex, Din l-Art Ħelwa Għawdex, Għawdix, Wirt Għawdex, Gozo Business Chamber, Gozo Tourism Association u l-Gozo University Group.
