Il-Prim Ministru Robert Abela żar l-investiment estensiv li qed isir fl-Iskola Primarja tar-Rabat u fis-Sekondarja ta’ Santa Luċija, biex isiru faċilitajiet ġodda li jgawdu minnhom l-istudenti.
L-investiment fl-iskola tar-Rabat, ta’ madwar tliet miljuni u nofs, se jissarraf fi skola tal-ogħla livell li se tagħmilha possibbli biex tibda topera minn binja waħda, minflok minn żewġ binjiet li kienet qed topera s’issa. Din l-iskola se tilqa’ l-ewwel studenti f’Settembru li ġej.
Waqt iż-żjara f’din l-iskola, il-Prim Ministru ra x-xogħol li qed isir mill-Fondazzjoni għall-Iskejjel ta’ Għada, u ġie spjegat li l-għan tal-proġett hu li din l-iskola toffri spazju edukattiv modern, aċċessibbli u komdu għat-tfal u l-edukaturi.
Din l-iskola se takkomoda madwar erba’ mitt tifel u tifla u se jkollha tlieta u tletin klassi mgħammrin ukoll għal suġġetti speċifiċi, bħall-arti u l-mużika, filwaqt li għaxar klassijiet se jkunu għal-livell ta’ Kindergarten.
Il-Kap Eżekuttiv għall-Fondazzjoni għall-Iskejjel t’Għada, Neville Young, spjega li b’dan l-investiment, l-istudenti se jkollhom gym fuq ġewwa, spazji rikreattivi fuq barra, multi-sensory room u anke kċina industrijali.
Il-proġett jinkludi wkoll spazju fejn jieklu t-tfal li jattendu għall-Breakfast Club.
“Din kienet skola fil-maġġoranza tagħha fuq żewġ sulari, kellu jsir xogħol ta’ kostruzzjoni fis-sens li twaqqgħu s-soqfa biex bnejna sular ieħor u allura ħa tkun qed tilqa’ l-cohort kollu tar-Rabat.”
Il-Prim Ministru kompla bi żjara fl-Iskola Sekondarja ta’ Santa Luċija, li fetħet il-bibien tagħha lura fis-snin disgħin u ma kinitx tinkludi sala.
Dan ifisser li l-istudenti riedu jużaw swali barra mill-iskola għal ċerti attivitajiet; iżda bl-investiment li qed jagħmel il-Gvern, din l-iskola issa se jkollha sala li tista’ tintuża bħala teatru u għal għanijiet oħrajn ukoll, biex l-istudenti jimirħu u jsaħħu t-tagħlim edukattiv tagħhom minn kull aspett.
Il-Prim Ministru żar ukoll kumpless sportiv ġdid, li qed jinbena biswit din is-sala, għal diversi dixxiplini sportivi.
Dawn il-proġetti qed isiru b’investiment kapitali ta’ madwar erba’ miljuni u sitt mitt elf ewro.
“Qed naraw kumpless sportiv kif ukoll multi-purpose hall li mhux biss ħa jintużaw mill-iskola waqt il-ħinijiet tal-iskola, imma se jkunu wkoll miftuħa għall-komunità lokali wara l-ħinijiet tal-iskola.”
Il-Prim Ministru sostna li dan l-investiment ma jiggarantixxix biss suċċess għat-tfal, imma wkoll għas-soċjetà u għall-pajjiż, għax proġetti bħal dawn joffru l-aqwa spazju għall-istudenti biex jiżviluppaw il-potenzjal sħiħ tagħhom u jilħqu l-aspirazzjonijiet.
Il-Prim Ministru tenna l-impenn tal-Gvern li jwettaq aktar investimenti bħal dawn biex jissaħħaħ l-ambjent edukattiv tat-tfal.
Dr Abela kien akkumpanjat mill-Ministru għall-Edukazzjoni Clifton Grima u mis-sindki rispettivi taż-żewġ lokalitajiet.
