Il-ġurnata tas-Sibt 17 ta’ Ġunju kienet waħda speċjali għall-boxer u kickboxer malti Brandon Borġ hekk kif waqt l-avveniment ta’ Combat Sports ‘Gods of War’, huwa rebaħ il-ġlieda li kellu u wara ippropona għaż-żwieġ lit-tfajla tiegħu Bernice.
Brandon Borġ huwa wieħed mill-aqwa atleti maltin fid-dixxiplini tal-Boxing u Kickboxing. Fis-serata tal-bieraħ, huwa rebaħ lill-ingliż Danny Warsfold u fi tmiem il-ġlieda għamel pass ieħor importanti u speċjali f’ħajtu, dak li jipproponi għaż-żwieġ lit-tfajla tiegħu Bernice.
F’kumment li ħalla fil-paġna personali tiegħu fuq facebook, huwa qal li l-appoġġ ta’ Bernice kien kruċjali għas-suċċessi tiegħu kemm fil-ħajja personali kif ukoll professjonali u jistenna bil-ħerqa li jaqsam il-bqija ta ħajtu magħha.
Brandon Borġ f’dawn l-aħħar jiem kien ukoll fl-aħbarijiet minħabba kampanja li qed jagħmel sabiex iqajjem kuxjenza akbar fuq il-kundizzjoni tal-awtiżmu.
Awguri Brandon u Bernice!
