L-aspirazzjoni tiegħi hija waħda: dik li ntejjeb ħajjet in-nies u li ma nibżax mill-bidla. Hekk sostna l-Prim Ministru Robert Abela meta kien intervista minn Lou Bondì waqt il-konferenza tal-Istat tan-Nazzjon, li saret il-Ġimgħa fil-Palazz Verdala.
“Aspirazzjoni waħda għandi fil-ħajja politika, dik li kemm jista’ jkun nagħmel minn kollox biex intejjeb il-ħajja tan-nies. Primarjament, niffoka fuq dawk li jistgħu l-inqas fis-soċjeta tagħna, mhux biex nogħqod ngħid li nħaddan prinċipji Soċjalisti, dawk imbagħad jiġġudika l-poplu, imma li nemmen illi aħna l-prinċipji tagħna bħala Gvern hija dik li ngħinu l-iktar lill-inqas faxxa tas-soċjeta tagħna.”
Fil-konferenza, organizzata mill-Uffiċċju tal-President ta’ Malta, il-Prim Ministru sostna li fejn sar tajjeb se nkomplu nibnu fuqu u fejn seta’ sar aħjar se nkomplu ntejbu. Dak hu l-għan tal-manifest ‘Malta Flimkien’, li qed jixpruna lil pajjiżna ’l quddiem billi jtejjeb il-kwalità tal-ħajja tal-poplu.
Hawnhekk, il-Prim Ministru tkellem dwar kif il-Gvern immexxi minnu kien kuraġġuż u għamel bosta riformi.
“Għamilna bidliet fis-saltna tad-Dritt, illi dan il-pajjiż qatt ma kellu l-kuraġġ li jagħmilhom. Semmejtkomlok diġa, imma l-kritika ssir dejjem, jien il-kritika nagħmilha lejn Gvernijiet Nazzjonalisti kollha, li kienu komdi bl-istatus qou tal-ġurnata, kienu komdi jaħtru by-hand pick mill-Prim Ministru ta’ dakinhar tagħżel l-Imħallef jew il-Maġistrat.”
Dr Abela sostna li l-pajjiż għandu jkompli bit-triq tat-tkabbir ekonomiku, sabiex il-ġid ikompli jasal għand kulħadd, waqt li pajjiżna ma jistaġnax kif ġara taħt Gvern Nazzjonalista.
“Fil-mument li dan il-pajjiż imur f’dik id-direzzjoni, ikun qed jagħmel ġennata ekonomikament. Ara ħadd ma jipprova jitlaq minn xi impressjoni li aħna għandna xi faċilita jew xi kumdita bħala pajjiż, li m’għandux l-ebda pajjiż ieħor illi nistgħu ngħidu; ejja t-tkabbir ekonomiku tal-pajjiż nikkalmawh, innaqsuh – fil-mument li nagħmlu hekk nibdew it-triq lura.”
Il-Prim Ministru qal li xogħol il-Gvern huwa li jipprovdi l-istabbilità fil-ħajja taċ-ċittadini u hawnhekk mess mal-isfida tal-inflazzjoni. Huwa nnota d-differenza bejn il-politika soċjali tal-Gvern u dik li għadha tħaddan l-Oppożizzjoni, bħal meta kienet fil-Gvern, li titfa’ l-piżijiet fuq in-nies.
“Ma żammejniex l-inflazzjoni l-isfel b’kumbinazzjoni għaliex faċli tiġi hawnhekk u tgħid dan Gvern li tilef l-għeruq Soċjalisti tiegħu, imma meta tagħmel miżura bħal dik li żżomm il-prezzijiet tal-enerġija u tal-fjuwil stabbli, dik mhux l-iktar miżura Soċjalista li inti tista’ tagħmel, dik il-miżura testendiha lill-poplu u lin-negozji kollha.”
Il-Prim Ministru qal li hawnhekk ukoll għandna Kap tal-Oppożizzjoni li jrid jidħol taħt mantell tas-soċjal iżda mbagħad jgħid li l-għajnuna li qed nagħtu fuq l-enerġija m’għandhiex tibqa’. Dr Abela nnota wkoll li dan il-Gvern jagħti ċekkijiet ta’ investiment fin-nies u l-Oppożizzjoni tgħid kontrihom. Huwa nnota d-differenza totali bejn il-politika ta’ Gvern Laburista u dik li jħaddan il-Partit Nazzjonalista.
Dwar it-tibdil fil-Kostituzzjoni, il-Prim Ministru qal li l-Gvern għamel tibdil maġġuri, fosthom li nfatam l-Avukat Ġenerali mill-eżekuttiv tal-pajjiż u hemmhekk inħoloq l-Uffiċċju tal-Avukat tal-Istat. Qal li l-Gvern irid jaħdem fuq aktar tibdil fil-kostituzzjoni u fost dawn hemm il-bidla fl-FIAU. Il-Prim Ministru, iżda, qal li din il-bidla tinsab ipparalizzata minħabba li l-Oppożizzjoni mhux taqbel u jeħtieġ il-vot taż-żewġ terzi. Huwa staqsa numru ta’ mistoqsijiet u qal li għandu jkun hemm diskussjoni dwar bidla fil-liġi elettorali.
Il-Prim Ministru saħaq li ma jistax ikollna nazzjon b’saħħtu jekk il-poplu ma jkunx b’saħħtu u hawn semma l-importanza tal-ugwaljanza. Semma d-drittijiet ċivili introdotti u l-bidliet li għamel il-Gvern, pereżempju fil-liġi tal-IVF, waqt li aktar nies qed isiru sidien ta’ darhom permezz ta’ skemi fil-qasam tal-akkomodazzjoni. Il-Prim Ministru ħeġġeġ biex ma jsirx l-iżball li sar minn Gvern Nazzjonalista bejn l-2008 u l-2013, meta staġna u għoġbu l-istatus quo. Mistoqsi min hu, il-Prim Ministru wieġeb li hu ma jibżax mill-bidliet u li se jibqa’ jimbotta favur riformi favur in-nies.
Irrimarka li hu jiddejjaq quddiem l-inġustizzji soċjali u rrefera għal sentenza tal-Qorti li ħarġet din il-ġimgħa, li fiha omm prospettiva li għaddiet minn abbuż spiċċat ikkundannata kriminalment skont il-liġi preżenti.
“Nemmen li jien bniedem illi l-inġustizzji soċjali jdejqu ħafna u jweġġawni. Kellna waħda din il-ġimgħa, jiġifieri din il-ġimgħa kellna sentenza, mhux ħa ngħid storika, għax ma nafx hux l-ewwel waħda, imma naħseb li hija minn tal-ewwel, fejn persuna, omm prospettiva ġiet ikkundannata għall-abort ġewwa pajjiżna u kważi ma tkellem ħadd.”
Il-Prim Ministru tkellem favur dibattitu biex ikun hawn leġiżlazzjoni favur ir-realtajiet tan-nies.
