Sidt proprjetà fil-Marsa li kienet b’kirja kummerċjali għal dawn l-aħħar 60 sena ngħatat ’il fuq minn €1 miljun f’danni pagabbli mill-Avukat tal-Istat, wara li nstab li l-mekkaniżmu leġiżlattiv attwali kiser id-drittijiet fundamentali ta’ sid il-kera.
Il-każ jikkonċerna proprjetà mikrija lil Briar Pipeworks Ltd mill-predeċessur fit-titolu ta’ Gabriella Fusco, li ressqet rikors kostituzzjonali sentejn ilu dwar il-fatt li ma setgħetx terġa’ tieħu l-pussess u lanqas tgħolli l-kera biex tirrifletti l-valur veru tas-suq tal-proprjetà. Dan, argumentat, jikser dritt fundamentali tagħha, imħares mill-Konvenzjoni Ewropea.
Il-Qorti sabet li s-sitwazzjoni tabilħaqq tikser id-dritt fundamentali tagħha għat-tgawdija paċifika tal-proprjetà, u wara li kkunsidrat diversi fatturi, ikkalkulat danni ta’ aktar minn miljun ewro.
