Iċ-champions tal-hockey Malti Qormi Daikin matul din il-ġimgħa se jkunu impenjati fil-Euro Hockey Challenge Division 3 li se jsir f’Ġibilta’.
It-tim immexxi minn Andre Ghio tela’ biex jilgħab f’Pool A kontra Eagles HC ta’ Ġibilta’, Valhalla Landhockey Club tal-Iżvezja u FHC Akademik Plus Sofia tal-Bulgarija.
Qormi jiddebuttaw f’din il-kompetizzjoni nhar il-Ħamis li ġej kontra Eagles HC sabiex l-għada jilagħbu kontra Valhalla.
Is-Sibt li ġej huma jaffrontaw lil Akademik Plus Sofia għall-aħħar logħba tal-grupp bit-tama li jiksbu pożizzjoni tajba sabiex fil-ġurnata finali tal-Ħadd jilagħbu l-logħba tar-ranking.
Is-sena l-oħra, Qormi Daikin kienu kisbu l-promozzjoni għat-tieni diviżjoni tal-istess kompetizzjoni, bi GREE Sliema Hotsticks li se jkunu qed jilagħbu f’din il-kategorija f’turnament ieħor li se jsir fit-Turkija.
