Il-Ministru għall-Ġustizzja, Jonathan Attard, kiteb lill-President ta’ Malta biex jappellalu biex, mill-aktar fis possibbli, tiġi żblokkata sitwazzjoni li nħolqot rigward l-għoti tal-warrant lil avukati u prokuraturi legali ġodda.
Il-Ministru qal li, jekk ma tinstabx soluzzjoni, il-Gvern ikollu jikkunsidra intervent leġiżlattiv biex issir ġustizzja mal-105 persuni li diġà ġew eżaminati, approvati li għandhom il-kwalifiki, u li huma kompetenti biex jeżerċitaw il-professjoni ta’ avukati u prokuraturi legali fil-Qrati ta’ Malta.
Il-Ministeru ppubblika l-ittra tiegħu lill-President ta’ Malta minħabba li korrispondenza li bagħtet il-Ħamis is-Segretarja tal-Kummissjoni għall-Amministrazzjoni tal-Ġustizzja qed tiġi ċċirkolati lil terzi persuni. F’dik l-imejl ġie kkomunikat li l-kandidati għall-warrant ta’ avukat u ta’ prokuratur ma jistgħux jgħaddu mill-iskrutinju ta’ persuna tajba u xierqa minħabba xi nuqqas attribwit lill-Ministru.
Il-Ministru esprima mal-President il-konvinzjoni tiegħu li kemm hu kif ukoll il-membri tal-Kummissjoni għall-Amministrazzjoni tal-Ġustizzja japprezzaw li dak espress fl-imejl inkwistjoni ma jirriflettix id-diskussjoni li saret fl-aħħar laqgħa li l-Ministru kellu mal-Kummissjoni, fis-27 ta’ Marzu.
Il-Ministru fakkar li f’dik il-laqgħa kien hu stess li esprima l-preokkupazzjoni tiegħu dwar din is-sitwazzjoni u anki spjega r-riservi u l-oġġezzjonijiet tiegħu għal dak propost mill-Kumitat għall-Avukati u l-Prokuraturi Legali, li huwa kumitat tal-Kummissjoni għall-Amministrazzjoni tal-Ġustizzja. Il-Ministru qal li, wara dik il-laqgħa u kif miftiehem, il-Ministeru għall-Ġustizzja bagħat anki jispjega x’inhuma r-riservi u l-oġġezzjonijiet tiegħu, kemm formalment kif ukoll informalment. Dan sar f’tentattiv biex il-Kummissjoni tipprova tiżblokka dan l-impasse.
Il-Ministeru qal li jibqa’ tal-fehma li l-informazzjoni li l-Kumitat għall-Avukati u Prokuraturi Legali jrid jitlob lil dawk li jkunu applikaw għall-warrant hija eċċessiva u ma tirrispettax id-dinjità tal-individwu u tal-privatezza tiegħu. Wissa li dan iħalli effett li anki jiskoraġġixxi persuni milli jersqu għall-professjoni legali.
Filwaqt li rriafferma l-impenn tal-Ministeru għall-Ġustizzja li jkompli jaħdem biex l-istandards fil-professjoni jogħlew, il-Ministru qal li ma jista’ qatt jaqbel li biex persuna tirċievi l-warrant trid, fost affarijiet oħra, tiddikjara jekk tbatix minn diżabilità fiżika; jekk fl-aħħar għaxar snin għaddietx minn mard psikoloġiku; jekk fl-aħħar għaxar snin kellhiex problemi ta’ vizzji, anki jekk tkun ħarġet minnhom; jekk hux suġġett għal, jew jagħmilx parti minn kawżi ċivili, inklużi ta’ natura familjari; u anki fejn kien jattendi skola primarja.
