Floriana Ajax X Clean A telgħu fl-ewwel post tal-klassifika tal-kampjonat 8-a-side tad-darts meta għelbu lil Top Gun Marsa 7-1.
Kienet logħba li l-Greens amministraw tajjeb bil-Marsin li huma destinati għat-tieni diviżjoni li ftit setgħu jagħmlu kontra l-qawwa tal-avversarji.
Fuq kollox, il-Furjaniżi ħadu vantaġġ mir-riżultati l-oħra li kienu favurihom hekk kif Fgura Kenky ħolqu sorpriża oħra wara li għelbu lil Education San Gejtanu Bar 5-3 barra minn darhom.
Il-Fgurin kienu preċiżi fit-tfigħ tagħhom bil-Ħamruniżi li minkejja li tawhom logħba kellhom joħorġu minn dan il-konfront bit-telf.
Ħamrun Bayern A baqgħu jsegwu u jinsabu issa erba’ punti biss bogħod mill-quċċata wara rebħa kbira ta’ 8-0 kontra Sliema Inter Darts Club.
Mill-banda l-oħra, Ħamrun Bayern B għelbu 5-3 lil Manchester Conquest Pub.
Fit-tieni diviżjoni, Birżebbuġa Lions, li huma diġa’ promossi għall-Ewwel Diviżjoni, għelbu 8-0 lil Mqabba tal-Ġilju filwaqt li PO’s Bar baqgħu jsegwuhom fil-klassifika wara rebħa tajba ta’ 6-2 kontra Fgura Maypole.
Fit-tielet diviżjoni, Domus Żejtun baqgħu fl-ewwel post wara li għelbu lil Duke’s A 5-3 filwaqt li Birgu Boċċi Club kellhom walk-over fuq Mqabba FC.
Żebbuġ Rangers FC saħħew it-tielet post tal-klassifika wara li għelbu lil Leah’s Bar 7-1.
KLASSIFIKA – L-EWWEL DIVIŻJONI
Floriana Ajax X Clean A 45, Education San Gejtanu Bar 43, Ħamrun Bayern A 41, Fgura Kenky 37 Manchester Conquest Pub 19, Ħamrun Bayern B 15, Sliema Inter DC 14, Top Gun Bar 3.
KLASSIFIKA – IT-TIENI DIVIŻJONI
Birżebbuġa Lions 46, PO’s Bar 41, Beland Bull’s Eye 20, Floriana Ajax X Clean B 17, Fgura Maypole 13, Cox Bar 11, Mqabba tal-Ġilju 10
KLASSIFIKA – IT-TIELET DIVIŻJONI
Domus Żejtun 40, Birgu Boċċi Club 39, Żebbuġ Rangers 31, Duke’s A 29, Duke’s B 17, Mqabba FC 4, Leah’s Bar 1.
