Santa Lucia kisbu punt prezzjuz fit-taqtiegħa kontra r-relegation meta rnexxielhom jiksbu draw ta’ 1-1 kontra ċ-ċampjins Hamrun Spartans grazzi għal goal lejn it-tmiem skurjat minn Jan Tanti.
Hamrun fetħu sa minn kmieni fuq l-attakk tant li wara żewġ minuti xutt mill-bogħod ta’ Luke Montebello għadda jħakkek mal-lasta.
Fis-17-il minuta Montebello qassam lil Prsa li minn pożizzjoni angolata kellu x-xutt tiegħu mblukkat mill-goalkeeper Calleja Cremona.
Minuta biss wara xutt b’saħtu ta’ Joseph Mbong ġie mxellef f’korner mid-difiża ta’ Santa Lucia.
Hamrun komplew jagħfsu u fil-21 minuta minn kross ta’ Barbosa kien il-goalkeeper Calleja Cremona li salva f’korner id-daqqa ta’ ras mill-qrib ta’ Holmberg.
Fil-35 minuta r-referee Malcolm Spiteri saffar għal penalty hekk kif Montebello ġie ffawljat hekk kif daħal fil-kaxxa mid-difensur Matthias Vella. Inkariga ruhu mill-penalty Elvis Mashike li għeleb lil Calleja Cremona b’xutt fil-baxx għar-rokna.
Hamrun kienu għoddhom irduppjaw fit-38 minuta iżda Montebello mill-qrib xeħet għoli.
Fit-tieni taqsima l-Ispartans reġgħu fetħu tajjeb u Callegari xxuttja ftit barra fit-48 minuta minn azzjoni ta’ korner.
Fil-55 minuta Camenzuli dendel ballun tajjeb għan-nofs imma l-konklużjoni ta’ Holmberg għaddiet ftit barra.
Fit-63 minuta Calleja Cremona salva tajjeb ix-xutt ta Montebello waqt li żewġ minuti wara salva wkoll tentattiv ta’ Prsa.
Fil-71 minuta f’kontrattakk rari ta’ Santa Lucia, kien il-GK Santos, li ssostitwixxa lil Henry Bonello bejn il-lasti Hamrunizi, li ċahhad lil Hehedosh mill-goal tad-draw meta salva f’korner ix-xutt mill-qrib ta’ l-attakkant tas-Saints minn pass ta’ Rodrigues Farias.
Iżda fid-79 minuta kien Jan Tanti li skorja l-goal tad-draw għas-Saints meta ħasad lill- Santos b’xutt minn tarf il-kaxxa li deher jaħbat ma’ sieq il-lasta qabel spiċċa fix-xibka.
Kienet prattikament l-aħħar azzjoni denja tal-partita anke jekk Hamrun ippruvaw jerġgħu jiskurjaw imma r-riżultat baqa’ ma nbidilx biex Santa Lucia kisbu punt prezzjuz fil-ġlieda kontra r-relegazzjoni.
Referee: Malcolm Spiteri
Player tal-Loghba: Robert Hehedosh (Santa Lucia)
