Żewġ persuni sofrew ġrieħi gravi wara li kienu involuti fi ġlieda fi Triq il-Ġifen, San Pawl il-Baħar.
Il-ġlieda seħħet ilbieraħ għall-ħabta tad-9:10 ta’ filgħaxija.
Minn stharriġ preliminari li sar, irriżulta li mara ta’ 30 sena, residenti s-Siġġiewi u raġel ta’ 31 sena residenti Ħ’Attard sfaw feruti wara li allegatament kienu qalgħu xi daqqiet minn xi persuni.
Il-vittmi ttieħdu ġewwa ċ-Ċentru tas-Saħħa tal-Mosta għall-kura meħtieġa fejn ġew iċċertifikati li qegħdin isofru minn ġrieħi gravi.
Wara iktar investigazzjonijiet li saru, il-Pulizija arrestat żagħżugħ ta’ 23 sena residenti l-Mosta li allegatament kien involut fil-każ. Huwa wkoll ittiehed ġewwa ċ-Ċentru tas-Saħħa tal-Mosta minħabba li kien ferut, fejn ġie ċċertifikat li qiegħed isofri minn ġrieħi ħfief. Iż-żagħżugħ għadu qed jinżamm mill-Pulizija għal iktar stħarriġ.
L-investigazzjonijiet tal-Pulizija dwar dan il-każ għadhom għaddejjin.
