Il-pjanist Taljan ta’ fama internazzjonali Francesco Attesti se jdoqq il-Goldberg Variations ta’ Bach fil-5 ta’ April, ippreżentat mill-Ambaxxata tal-Italja, it-Teatru Manoel u l-Istitut Kulturali Taljan.
The Goldberg Variations BWV 988, li huma meqjusa minn ħafna bħala wieħed mill-aktar xogħlijiet diffiċli li qatt inkitbu għat-tastiera, u eżempju importanti tal-forma tal-varjazzjoni, jikkonsistu f’arja u sett ta’ 30 varjazzjoni – imsemmija għall-ewwel artist li jingħad li daqqhom, Johann Gottlieb Goldberg.
“Il-kompożituri Taljani huma magħrufa mad-dinja kollha, minn Monteverdi sa Busoni, minn Scarlatti sa Berio,” qal l-Ambaxxatur Taljan Fabrizio Romano.
“L-Italja hija wkoll pajjiż ta’ surmastri, interpreti u artisti performattivi. Fejn jidħol il-pjanu, kull min iħobb il-mużika huwa familjari ma’ Benedetti Michelangeli, Pollini u Ciccolini. Fil-vena ta’ din it-tradizzjoni, Francesco Attesti huwa eżempju liema bħalu tal-ġenerazzjoni żagħżugħa ta’ mużiċisti li jġibu magħhom kemm rispett kif ukoll ideat ġodda, u b’mod speċjali, teknika sofistikata.”
Fost il-ġenerazzjoni tiegħu, Francesco Attesti huwa wieħed mill-ifjen interpreti tar-repertorju romantiku u tas-snin bikrin tas-seklu 20. Huwa tħarreġ f’Salzburg, Ruma u Firenze, waqt li rfina l-ħiliet tiegħu taħt l-istruzzjoni ta’ bosta Diretturi Mużikali prestiġjużi.
Francesco Attesti se jdoqq The Goldberg Variations ta’ JS Bach fit-Teatru Manoel fil-5 ta’ April 2023, fit-8pm. Dan il-kunċert qed jiġi ppreżentat mill-Ambaxxata tal-Italja, it-Teatru Manoel u l-Istitut Kulturali Taljan. Il-biljetti jinkisbu mis-sit www.teatrumanoel.mt, jew b’email lil bookings@teatrumanoel.mt jew billi ċċempel fuq (+356) 2124 6389.
