Minkejja li serrħu tlett plejers importanti Hamrun mill-ewwel urew x’inhuma l-intenzjonijiet tagħhom hekk kif ħarġu fuq l-attakk b’Jonny jittanta xortih b’xutt fil-baxx wara tliet minuti li għadda ftit barra.
L-Ispartans fetħu l-iskor fil-21 minuta meta azzjoni korali bejn diversi players wasslet biex Luke Montebello jidħol fil-kaxxa u minn qagħda xi ftit angolata b’xutt fil-baxx għar-rokna għeleb lill-gowler Jonathan Debono.
Montebello kellu fejn jirdoppja fid-29 minuta meta xxuttja għoli mill-qrib wara xogħol tajjeb ta’ Jonny, imma minuta biss wara kien l-istess Montebello li approfitta minn inċertezza fid-difiza ta’ Balzan u b’xutt imkaxkar għeleb għal darb’oħra lil Debono biex għamel l-iskor 2-0.
Fit-32 minuta Balzan ħolqu l-ewwel azzjoni perikoluża imma l-konklużjoni ta’ Bojan Kaljevic giegħlet lill-gowler Hamruniż Henry Bonello jsalva f’korner.
Fl-40 minuta Hamrun komplew ikabbru l-vantaġġ meta Montebello kkrossja fil-baxx u Elvis Mashike mill-qrib mattar siequ biex tefa’ l-ballun fix-xiba.
Żewg minuti wara kienet il-lasta li ċaħdet lil Angel Torres milli jnaqqas il-marġini għal Balzan.
Fit-tieni taqsima Hamrun naqqsu ħafna mir-ritmu li wrew matul l-ewwel 45 minuta tant li kienu Balzan li resqu viċin f’żewġ okkażjonijiet
Fil-51 minuta kien Marcus Grima li x-xutt tiegħu ġie salvat b’diffikulta’ minn Bonello, waqt li fis-57 minuta reġa’ kien Bonello li nterċetta f’korner kross insidjuż ta’ Momcilo Raso.
Hamrun wieġbu b’azzjoni insidjuża ta’ Jonny fil-61 minuta fejn daħal fil-kaxxa imma waqa’ meta gie f’kuntatt mal-gowler Debono bir-referee jsaffar ghal sempliċi goal kick minkejja l-protesti għal penalty tal-plajer Hamruniż.
Hamrun pero’ komplew ikabbru l-vantaġġ fis-70 minuta meta Ederson Domingos temm azzjoni personali b’xutt li għeleb għal kollox lil Debono biex spiċċa fir-rokna tax-xibka.
Fit-78 minuta Hamrun kienu għoddhom żiedu goal ieħor meta Camenzuli kkrossja għan-nofs u l-gowler Debono kellu jintefa’ minn tulu biex dawwar f’korner id-daqqa ta’ ras ta’ Mashike.
Fid-89 minuta il-gowler Bonello ċaħħad lis-sostitut Gabriel Farrugia milli jnaqqas il-marġini meta salva d-daqqa ta’ ras mill-qrib tiegħu mill-kross ta’ Samir Arab.
Referee: Trustin Farrugia Cann
Plejer tal-Loghba: Luke Montebello (Hamrun S.)
